Ayollardan ham undiriladi: Samarqandda 483, Farg‘onada 379 nafar ona aliment to‘lamoqda

Majburiy ijro byurosi axborot xizmati rahbari Farrux Toshpo‘latov bergan ma’lumotlarga ko‘ra Respublika bo‘yicha qarzdor ayollar bo‘lgan aliment undiruvi bilan bog‘liq 3 mingdan ortiq ijro hujjatlari mavjud. Hududiy jihatdan ayollar tomonidan eng ko‘p aliment to‘lash ko‘rsatkichi Samarqand (483 ta) va Farg‘ona (379 ta) viloyatlariga to‘g‘ri keladi.

Mazkur toifadagi undiruvlar bo‘yicha undirilishi lozim bo‘lgan mablag‘ jami bo‘lib ikki oydan ortiq muddat mobaynida to‘lanmagan taqdirda MJtKning 47-4-moddasiga asosan ma’muriy javobgarlik, shunday qilmish uchun ma’muriy jazo qo‘llanganidan keyin ham jami bo‘lib ikki oydan ortiq muddat mobaynida to‘lamagan taqdirda unga nisbatan JKning 122-moddasiga asosan jinoiy javobgarlikka tortish choralari ko‘riladi. Ya’ni bu o‘rinda erkaklarga qanday talab qo‘yilgan bo‘lsa, ayollarga ham xuddi shu talablar qo‘llanadi.

Bordi-yu aliment to‘lovchi chet elga ketish niyatida bo‘lsa, Oila kodeksining 145-moddasiga muvofiq, aliment to‘lashi shart bo‘lgan shaxs doimiy yashash uchun yoki uch oydan ortiq muddatga chet davlatga ketayotganida qonunga muvofiq o‘zi ta’minot berishi lozim bo‘lgan aliment oluvchilar bilan ushbu Kodeksning 130-134-moddalariga asosan aliment to‘lash to‘g‘risida kelishuv tuzishi shart.

Aliment to‘lash to‘g‘risida kelishuvga erishilmagan taqdirda manfaatdor shaxs aliment miqdorining pul bilan to‘lanadigan qat’iy summada belgilanishi va alimentni biryo‘la to‘lash to‘g‘risida yoki aliment evaziga muayyan mol-mulkni berish yoxud alimentni boshqa usulda to‘lash to‘g‘risidagi talab bilan sudga murojaat qilishga haqli.

Voyaga yetmagan bolalar ta’minoti uchun alimentlar oldindan to‘langan yoki aliment to‘lash majburiyatini ta’minlash uchun garov shartnomasi tuzilgan bo‘lsa, shaxs aliment to‘lash to‘g‘risida kelishuv tuzish majburiyatidan ozod etiladi.