O‘zbekiston noolimpiya sport turlari konfederatsiyasi tashkil etiladi

Vazirlar Mahkamasining “Olimpiya va Paralimpiya, Osiyo va Paraosiyo o‘yinlari dasturiga kiritilmagan sport turlarini qo‘llab-quvvatlash hamda tartibga solishning qo‘shimcha chora-tadbirlari to‘g‘risida”gi qarori loyihasi e’lon qilindi.

Qaror loyihasida Olimpiya va Paralimpiya, Osiyo va Paraosiyo o‘yinlari dasturiga kiritilmagan sportni rivojlantirish va qo‘llab-quvvatlashning asosiy yo‘nalishlari belgilanmoqda.

Qaror loyihasi qabul qilinishi natijasida noolimpiya sport turlari bo‘yicha federatsiya va assotsiatsiyalar muassisligida O‘zbekiston noolimpiya sport turlari konfederatsiyasi tashkil etiladi.

Konfederatsiyaga quyidagi vakolatlar uning taqdimnomasi asosida Yoshlar siyosati va sport vazirligi tomonidan beriladi:

• sportchilarning barcha yosh toifalari va jinsiy mansubligi bo‘yicha O‘zbekiston sport terma jamoalari va ularning zaxirasini shakllantirish va tasdiqlash;
• sport turlarini va sport turining tarmoqlarini e’tirof etish reyestriga kiritish hamda istiqbolsiz deb topilgan noolimpiya sport turlarini reyestrdan chiqarish;
• xalqaro toifadagi O‘zbekiston sport ustasi, O‘zbekiston grossmeysteri, O‘zbekiston sport ustasi sport unvonlarini berish;
• noolimpiya sport turlari bo‘yicha sport musobaqalarini tashkil etish va o‘tkazish bo‘yicha yillik nizomlarni tasdiqlash;
• sport va ommaviy jismoniy tarbiya tadbirlarining respublika kalendar rejasini shakllantirish.