Turkiyada prezidentlik va parlament saylovlarida ovozlarni hisoblash jarayoni davom etmoqda.
A Haber agentligi ma’lumotiga ko‘ra, hozirga kelib saylov qutilarining 93 foizi ochilib, ovozlar hisoblangan. Amaldagi prezident Erdo‘g‘an hamon oldinda, ammo unga berilgan ovozlar miqdori 49,67 foizgacha tushib ketdi, bu esa prezidentlik saylovlarida ikki haftadan keyin, 28 may kuni ikkinchi tur bo‘lishini ko‘rsatadi. Uning asosiy raqibi Kamol Qilichdoro‘g‘li to‘plagan ovozlar 44,59 foizga yetdi.
- 99,2 foiz ovozlar hisoblanganidan keyin Erdo‘g‘anning natijasi 49,39, Qilichdoro‘g‘liniki 44,97 foizni tashkil etmoqda. Ikkinchi tur bo‘ladi.
Shu bilan birga, ikki tomonning vakillari amalda o‘z nomzodlari g‘alaba qozonganini aytmoqda.
Muxolifat nomzodi Kamol Qilichdoro‘g‘li butun mamlakat bo‘ylab muxolifat kuzatuvchilarini saylov qutilaridan ko‘z uzmaslikka chaqirgan. U shuningdek Oliy saylov kengashidan yirik shaharlardagi ovoz berish natijalarini e’lon qilishni so‘ragan.
«60 foizdan boshlangan fantastika hozir 50 foizdan pastga tushdi. Saylov byulletenlarini kuzatuvchilar va saylov komissiyasining mansabdor shaxslari hech qachon o‘z joylarini tark etmasligi kerak. Bu kecha uxlamaymiz, xalqim», — deya yozdi Qilichdoro‘g‘li tvitterida.
Turkiya Oliy saylov kengashi raisi Ahmet Yyener jurnalistlar qarshisiga chiqib, qisqa axborot berdi va so‘nggi rasmiy ma’lumotlarni e’lon qildi. Uning ma’lumotlariga ko‘ra, Turkiyada ovozlarning 47,08 foizi va xorijdagi saylov uchastkalaridagi ovozlarning 12,60 foizi rasman hisobga olingan. U rasmiy natijalar e’lon qilinishi qasddan kechiktirilayotgani to‘g‘risidagi ayblovni rad etdi.
Muxolifat yetakchisi Kamol Qilichdoro‘g‘li kengashni natijalarni o‘z vaqtida taqdim etmayotgani uchun tanqid qilgandi.
Muxolifat bir necha bor natijalarga tanqidiy yondashishga chaqirib, saylov komissiyasi rasmiylari hukumat manfaatlariga ishlayotganini aytishgan.
Erdo‘g‘anning Adolat va taraqqiyot partiyasi raisi Umar Chelik esa ovozlarni hisoblash jarayoni mutlaqo shaffof kechayotgani va barcha prezidentning g‘alabasini tan olishi lozimligini aytgan.
Anka xususiy yangiliklar agentligi ma’lumotiga ko‘ra, ovozlarning 78 foizi hisoblab chiqilgan holatda prezident Erdo‘g‘anda - 48,5 foiz, Qilichdoro‘g‘lida - 45,7 foiz ovoz to‘plangan.
