Fuqaroga mayda bezorilik, IIO xodimlarining qonuniy talabini bajarmaslik va ularga qarshilik qilish ayblovlari qo‘yildi.
Instagram'da uy savdosi bilan shug‘ullanuvchi bloger va IIO xodimlari o‘rtasida janjal yuzaga kelgani aks etgan video tarqaldi.
Videoda, tasvirga olayotgan fuqaro “akamni uryapsiz, ko‘rib turibmiz-ku”, deydi. Shuningdek, blogerning “chakagimga urdingiz, men sizni urolmayman-da”, degan gaplari ham eshitiladi. Tasvirlarda IIO xodimlari erkakni xonadan chiqishiga qarshilik qilganini ko‘rish mumkin.
Toshkent shahar IIBB axborotiga ko‘ra, 14 may kuni poytaxt YHXB xodimlari Shayxontohur tumanidagi jarima maydonchasiga fuqaro I.D. tomonidan hech qanday hujjatlarsiz boshqarib yurilgan “Toyota” mashinasini ma’muriy bayonnoma asosida olib kelgan.
“Biroq, hujjatlarni rasmiylashtirish jarayonida I.D. jamoat tartibini buzib, ichki ishlar organlari xodimlarining qonuniy talablarini bajarmay, ularga nisbatan qarshilik ko‘rsatgan”, – deyiladi bayonotda.
Holat yuzasidan Shayxontohur tumani IIO FMB tomonidan fuqaro I.D.ga nisbatan Ma’muriy javobgarlik to‘g‘risidagi kodeksning 183-moddasi (“Mayda bezorilik”), 194-moddasi (“Ichki ishlar organlari xodimining qonuniy talablarini bajarmaslik”) va 195-moddasi (“Ichki ishlar organlari xodimlarining o‘z xizmat burchlarini bajarishlariga qarshilik ko‘rsatish”) bilan ma’muriy bayonnoma rasmiylashtirilgan.
Jinoyat ishlari bo‘yicha Shayxontohur tumani sudi bu bayonnomalar asosida blogerga nisbatan 10 sutka ma’muriy qamoq jazosini tayinlagan.
Voqeaga guvoh bo‘lgan va videoni tarqatgan shaxs – bloger tuhmatlar asosida qamalganini hamda guvoh bo‘lishiga qaramay, o‘zi sudga kiritilmagani aytgan.
