Rossiya dumasi Yevropada oddiy qurolli kuchlar to‘g‘risidagi shartnomani bekor qildi

Rossiya Federatsiyasi Davlat dumasi 16 may, seshanba kuni Yevropada oddiy qurolli kuchlar to‘g‘risidagi shartnomani denonsatsiya qilish haqidagi qonunni qabul qildi. Davlat dumasi raisi Vyacheslav Volodin bu qaror “Rossiya fuqarolari manfaatlaridan kelib chiqqan holda” qabul qilinganini aytdi.

Yevropada oddiy qurolli kuchlar to‘g‘risidagi shartnoma 1990 yil 19 noyabrda Parijda NATOning 16 ta davlati (Belgiya, Buyuk Britaniya, Germaniya, Gretsiya, Daniya, Islandiya, Ispaniya, Italiya, Kanada, Lyuksemburg, Niderlandiya, Norvegiya, Portugaliya, AQSh, Turkiya va Fransiya) hamda Varshava shartnomasining oltita davlati (Bolgariya, Vengriya, Polsha, Ruminiya, SSSR va Chexoslovakiya) tomonidan imzolangan, 1992 yil 9 noyabrda kuchga kirgan. Shartnoma imzolagan davlatlar ega bo‘lishi mumkin bo‘lgan harbiy texnika, jumladan, tanklar, artilleriya, vertolyotlar va samolyotlar miqdori uchun kvotalarni belgilab bergan.

1999 yilda Yevropada oddiy qurolli kuchlar to‘g‘risidagi shartnomani yangi siyosiy voqelik asosida moslashtirishga qaror qilindi, ammo Shimoliy Atlantika ittifoqi davlatlari moslashtirilgan shartnomani ratifikatsiya qilmay, Rossiyadan Gurjiston va Dnestrbo‘yidan qo‘shinlarini olib chiqish majburiyatlarini bajarishini so‘radi, Boltiqbo‘yi mamlakatlari (Latviya, Litva, Estoniya) va bir qator Bolqon davlatlari (Sloveniya, Albaniya va Xorvatiya) unga qo‘shilishdan bosh tortdi.

Rossiya 2007 yilda NATO davlatlaridan shartnomani ratifikatsiya qilishni talab qilib, undagi ishtirokini to‘xtatgan edi. 2015 yilda Rossiya Federatsiyasi Yevropada oddiy qurolli kuchlar to‘g‘risidagi shartnoma bo‘yicha Qo‘shma maslahat guruhi yig‘ilishlarida ishtirok etishni to‘xtatdi.