NATO so‘nggi o‘n yilliklarda birinchi marta Rossiyaga qarshi mudofaa rejasini tayyorlaydi

Sovuq urush davridan beri birinchi marta NATO Rossiya hujumlarini qaytarish rejasini tayyorlamoqda. 18 may, payshanba kuni Reuters agentligining xabar berishicha, iyul oyida Vilnyusda bo‘lib o‘tadigan sammitda NATOga a’zo davlatlar Rossiya bilan yuzaga kelishi mumkin bo‘lgan qarama-qarshilik bo‘yicha minglab sahifali maxfiy rejalarni qabul qiladi.

Bir necha o‘n yilliklar ichida birinchi marta bu rejalar Rossiya bilan mumkin bo‘lgan harbiy qarama-qarshilikni batafsil bayon qiladi. Agentlik tushuntirishicha, buning sababi - NATO Rossiyaning Ukrainaga qarshi urushi boshlanganidan so‘ng, uzoq vaqt davomida alyans uchun “ekzistensial tahdid” hisoblanmagan Rossiya Federatsiyasiga nisbatan siyosatini qayta ko‘rib chiqdi.

“Biz Rossiya bilan har qanday vaqtda mojaro kelib chiqishiga tayyor bo‘lishimiz kerak”, — deya NATOning oliy harbiy amaldorlaridan biri, admiral Rob Bauerning so‘zlaridan iqtibos keltiradi Reuters agentligi. Uning so‘zlariga ko‘ra, Vilnyusdagi sammitda NATO a’zo davlatlarga qurolli kuchlari va logistikasini qanday modernizatsiya qilish kerakligi haqida ham tavsiyalar beradi.

NATO bosh kotibi Yyens Stoltenberg o‘z navbatida: “Ittifoqchilar qanday kuchlar va vositalar kerakligini, jumladan, qayerda, nimani va qanday joylashtirish lozimligini aniq bilib oladilar”, dedi. Alyans vakillarining so‘zlariga ko‘ra, barcha rejalarni amalga oshirish uchun bir necha yil kerak bo‘ladi, biroq NATO, kerak bo‘lsa, darhol jangga kirishga tayyor bo‘ladi.