Bundesligada chempionlik o‘yini, A Seriyada YeChL uchun kurash, APL va La Ligada hayot-mamot jangi. Hafta o‘yinlari anonsi
|21:11 / 27.05.20237 87815 min
Shanba va yakshanba kuni Yevropada mavsumning hal qiluvchi so‘nggi o‘yinlari bo‘lib o‘tadi. Bundesligada chempion nomi ma’lum bo‘lsa, A Seriyada Chempionlar ligasiga yo‘llanma oladigan yana bir jamoa nomi oydinlashadi. Angliya va Ispaniyada esa ligada qolish uchun kurash davom etadi.
Foto: Getty ImagesFoto: Getty Images
Ertaga, 28 may kuni «PSJ» rasman Fransiya chempioniga aylanishi ehtimoli katta. Bu chempionlikdagi yana bir jihat shuki, sovrin parijliklar uchun 11-chempionlik sanaladi va klub bu ko‘rsatkich bo‘yicha Fransiyada yakka peshqadamga aylanadi. «Sent Eten» klubida ham 10 ta chempionlik bor.
Albatta, bu dam olish kunlaridagi futbol intrigalarining eng kichigi. Oldinda bizni Bundesliga chempionligi masalasi, Italiya va Germaniyada YeChL o‘rinlari uchun kurash va La Ligadagi o‘rin uchun birdaniga yetti jamoaning kurashi kutib turibdi. Kuchli beshlikdagi so‘nggi turlar bo‘lgani uchun bu safar anonsimizni boshqacharoq formatda tayyorladik.
«Borussiya» Bundesligani yutadimi?
BORUSSIYa D – Mayns (27 may, 18:30)
Kyoln – BAVARIYa (27 may, 18:30)
Oxirgi marta «Borussiya» 2011/12 mavsumda Yurgen Klopp qo‘l ostida mamlakat chempioniga aylangandilar. Shundan buyon qatorasiga 10 mavsum «Bavariya»ning gigemonligida kechdi va bugun ushbu seriya yakuniga yetishi mumkin.
Buning uchun dortmundliklar o‘z maydonida turnir jadvali 9-o‘rinda borayotgan va plyus-minus bir pog‘onadan boshqa motivatsiyasi bo‘lmagan «Mayns» ustidan g‘alaba qozonsa kifoya. «Bavariya»ning kutilmaganda «Leypsig»dan mag‘lubiyati Terzich shogirdlariga mana shunday sovg‘a taqdim etdi. Albatta, mana shunday «sovg‘a»ni qabul qilib olish uchun ham o‘sha yerda turish kerak, ya’ni, agar yakunda chempion bo‘lishsa, «Borussiya» to‘liq bu sovringa haqli. Ayniqsa, o‘sha o‘n yil oldin «Borussiya»ga kelib, birorta ham sovrin yutmagan, chempionlik mundialini esa, jarohat tufayli o‘tkazib yuborgan Marko Roys faoliyatida chempionlik sovriniga ega bo‘lishga haqlidir. Hech bo‘lmasa, Dortmund muxlislarining ushbu o‘yinga tayyorlab qo‘yadigan performansi uchun ham uchrashuvni tomosha qilish shart.
«Borussiya»dan 2 ochko ortda borayotgan «Bavariya» esa, o‘z o‘yinini «Mayns»ning qo‘shnisi bo‘lgan «Kyoln»ga qarshi safarda o‘tkazadi. Myunxenliklar bu o‘yinda g‘alaba qozonishi va Dortmundda mezbonlarning mag‘lubiyati yoki durangidan umid qilishi kerak bo‘ladi. To‘plar nisbatiga ko‘ra «Bavariya» ustun, demak ochkolarning tengligi ham Tuxel shogirdlarining foydasiga ishlaydi.
YeChL sharqdan ikki jamoa?
AYNTRAXT – Frayburg (27 may, 18:30)
UNION BeRLIN – Verder (27 may, 18:30)
Tarixda birinchi marta, aniqrog‘i, Germaniya birlashganidan buyon, ilk marotaba sharqiy qismdan ikki jamoa YeChL ishtirokchisi bo‘lishga yaqin turibdi. «RB Leypsig» 4-o‘rindan 4 ochkoga ilgarilab ketdi va uchinchi o‘rinni rasman hal etdi. 4-o‘rin uchun kurash esa, hozirda teng ochko to‘plagan «Union Berlin» va «Frayburg» o‘rtasida bormoqda.
Mavzuga oid
Aytish mumkinki, har ikki jamoa so‘nggi yillarda juda to‘g‘ri yo‘nalishda ish olib bordi va Bundesligada jiddiy kuchga aylandi. O‘tgan mavsumda bu jamoalar beshinchi va oltinchi o‘rinni olib, Yevropa Ligasiga yo‘llanmani qo‘lga kiritgach, ikki frontda kurash ularni qiynab qo‘yishi va yakunda pasayish kuzatilishini taxmin qilishgandi. Ammo yo‘q, Yevropa Ligasida ham munosib qatnashib, har ikkisi pley-offga ham chiqishdi, Bundesligada esa, keyingi qadamni tashlashga tayyor turishibdi.
Hozirda har ikki jamoada 59 tadan ochko bor. To‘plar nisbatiga ko‘ra «Union Berlin» yuqoriroq joylashgan. So‘nggi turda berlinliklar «Verder»ni qabul qilsa, «Frayburg» «Ayntraxt» mehmoni bo‘ladi. Tabiiyki, o‘z maydonida, buning ustiga kuchsizroq raqib bilan o‘ynaydigan «Union»ning imkoniyati yuqoriroq baholanmoqda.
A Seriyada to‘rtinchi jamoa qaysi?
INTeR – ATALANTA (27 may, 23:45)
YuVeNTUS – MILAN (28 may, 23:45)
Italiya klublari ichida YeChL yo‘llanmasi kurashi shu qadar chalkashki, hatto to‘rtlikka kirishi aniq bo‘lib ulgurgan «Latsio» ham o‘zini xavfsiz his qila olmaydi. Sababi, mabodo «Roma» Yevropa Ligasini, hamda «Inter» YeChLni yutsa-yu, bu ikki jamoa to‘rtlikka kira olishmasa, kelasi mavsumda ushbu muhim yevrokubokda Italiyadan 5 jamoa qatnashadi va 4-o‘rinni olgan jamoa tushib qoladi. Nazariy tomondan, «Latsio» to‘rtinchi o‘ringa tushib qolishi mumkin.
Mayli, hali bu haqida gapirishga erta. Shu turning o‘zida YeChL yo‘llanmasiga ta’sir ko‘rsatadigan ikki katta o‘yin bo‘lib o‘tadi. «Inter» o‘z maydonida «Atalanta»ni mag‘lub etishi va YeChL o‘rinlaridan birini o‘zi uchun naqdlab qo‘yishi mumkin. «Atalanta» uchun esa aksincha, mag‘lubiyat va hatto durang jamoaning YeChL orzusidan mosuvo qiladi.
Ertasiga esa, Turinda ham markaziy o‘yin ko‘rishimiz mumkin. «Yuventus»dan 10 ochko olib tashlashgan bo‘lishsa-da, jamoa hamon YeChL o‘rinlariga da’vogarlik qilmoqda. Buning uchun turinliklar «Milan» ustidan g‘alaba qozonishlari, hamda so‘nggi turda ham «Milan»ning mag‘lubiyatga uchrashidan umid qilishiga to‘g‘ri keladi. Agar «Yuventus» g‘alaba qozonsa, ochkolari soni 62 taga yetadi. «Milan»da 64 ta. Milanliklarning so‘nggi turdagi o‘yini ligada jon saqlash uchun kurashayotgan «Verona»ga qarshi kechinishi inobatga olsak, «Yuventus»da hali imkoniyat bor. Xo‘sh, «Milan» so‘nggi turda durang o‘ynasa va ochkolar teng bo‘lib qolsa, nima bo‘ladi? Bu holatni ham hisobga olish uchun «Yuventus» «Milan» ustidan ikki to‘p farqi bilan g‘alaba qozonishi lozim. «A Seriya» reglamentiga ko‘ra, ochkolar teng kelib qolganida, avvalo, o‘zaro o‘yinlarga qaraladi: birinchi davradagi bahsda «Milan» 2:0 hisobida ustun kelgan. Agar «Yuventus» o‘zaro o‘yinda shu farqni yopa olsa, so‘nggi turdagi durangdan umid qilishi mumkin, chunki umumiy to‘plar nisbatiga ko‘ra, turinliklar oldinda.
Demak, «Inter» g‘alaba qozonsa, YeChL ishtirokchisiga aylanadi. «Atalanta»ga kurashni so‘nggi turdayam davom ettirishi uchun g‘alaba zarur. Xuddi shunday, «Yuventus» ham so‘nggi turda «Milan»ning yo‘qotishidan umid qilish uchun o‘zaro o‘yinda «Milan»ni, iloji bo‘lsa, 2 to‘p farqi bilan yutishi talab etiladi.
APL ni kim tark etadi?
LIDS (31 ochko, 19-o‘rin) – Tottenhem (28 may, 20:30)
LeSTeR (31 ochko, 18-o‘rin) – Vest Hem (28 may, 20:30)
EVeRTON (33 ochko, 17-o‘rin) – Bornmut (28 may, 20:30)
Hafta o‘rtasidagi o‘yinlardan so‘ng, Angliyadan kelasi mavsumda YeChL va Yevropa Ligasida qaysi jamoalar qatnashishi aniq bo‘lib ulgurdi. Faqat «Aston Villa» va «Tottenhem»dan qaysi biri Konferensiyalar kubogiga tushishi so‘roq ostida, ammo bu ayniqsa, «Tottenhem»ni uncha qiziqtirmasa kerak. Ammo balkim, pley-offlar qiroli Emerini yana bir yevrokubokda ko‘rish yoki «Tottenhem»ning nihoyat biror sovrin yutishi, o‘ziga yarasha intriga bo‘lishi ham mumkin.
Asosiy kurash turnir jadvali quyida kechadi va afsuski, o‘ziga yarasha tarixga ega bo‘lgan jamoalardan ikkitasi turnirni tark etadi. «Everton» hech qachon quyi ligaga tushib ketmagan, «Lester» yaqindagina chempion bo‘lgan, YeChL yo‘llanmasi uchun kurashib yurgan jamoa, «Lids» esa, APLning maftunkor jamoalaridan biri, uch yil oldin jamoa uzoq tanaffusdan so‘ng, APLga qaytganda, katta voqeaga aylangandi.
«Everton»da 33 ochko va o‘z maydonida «Bornmut»ni qabul qiladi. Barcha masala shu o‘yinning o‘zidayoq hal bo‘lishi mumkin, zero agar mezbonlar «Bornmut» ustidan g‘alaba qozonishsa, narigi raqiblar qanday natija qayd etishidan qat’i nazar APLni tark etishadi. Durang «Everton» uchun xavfli, chunki u holda «Lester» o‘z o‘yinini yutib, to‘plar nisbatiga ko‘ra «EvertoN»ni quvib o‘tishi mumkin.
«Lids Yunayted»da qanday imkoniyat bor? Ellardays shogirdlari ligada qolishi uchun, avvalo, «Tottenhem» ustidan g‘alaba qozonishi va shuningdek, «Everton»ning mag‘lubiyati, hamda «Lester»ning ochko yo‘qotishidan umid qilishi kerak bo‘ladi.
Ispaniyada kelsi hafta ham tur bo‘ladi, ammo 37-turda ham e’tiborga arzirli uchrashuvlar juda ko‘p. Zero turnir jadvali quyi qismida ligada jon saqlab qolish uchun qizg‘in kurash kechmoqda, hatto 13-o‘rinni egallab turgan «Valensiya» ham o‘zini xavfsiz his qila olmaydi.
La Ligani faqat «Elche» allaqachon tark etib ulgurgan. Qolgan ikki o‘ringa birdaniga 7 jamoa da’vogarlik qilib turibdi. Qizig‘i, mana shu 7 jamoaning 6 tasi ushbu turda o‘zaro o‘yinda kuch sinashadi. Dahshat.
Yuqorida tilga olingan «Valensiya» 40 ochkoga ega, ammo 18-o‘rindan atigi 3 ochkolik farq ajratib turibdi xolos. Bu turda «Valensiya» «Espanol»ni qabul qiladi va kataloniyaliklarda 35 ochko bor. Demak, so‘nggi turdan umid qilish uchun «Espanol» bu o‘yinda g‘alaba uchun harakat qiladi.
«Kadis»ning «Selta»ga qarshi o‘yini ham haqiqiy jang bo‘ladi – «Kadis»da 38, «Selta»da esa, 40 ochko bor. G‘alaba mezbonlarni vigoliklarni quvib o‘tish imkonini taqdim etadi. Yana bir o‘zaro o‘yin «Valyadolid» va «Almeriya» o‘rtasida kechadi – har ikki jamoa ham mana shu yettitalikda joylashgan. Birgina «Xetafe» bu turda to‘g‘ridan to‘g‘ri raqobatchisi bilan uchrashmaydi, ammo uning raqibi ham kuchli: yevrokubok o‘rinlari uchun kurashayotgan «Osasuna». So‘nggi turda esa, «Xetafe»ning «Valyadolid»ga qarshi o‘zaro o‘yini bor.
Fransiyada to‘rtinchi o‘rin kimniki?
ReNN – MONAKO (28 may, 23:55)
LILL – Nant (28 may, 23:55)
«PSJ» hali rasman chempionligini nishonlamagan bo‘lsa-da, amaliy tomondan hammasi ma’lum – parijliklar qolgan ikki o‘yinni 5tadan to‘p farqi bilan yutqazib, «Lans» o‘z o‘yinlarini yirik hisobda yutmasa, peshqadam o‘zgarmaydi. Demak, katta ehtimol bilan bu turdan so‘ng rasman Fransiya chempioni nomi ma’lum bo‘ladi – «PSJ»ga «Klermon» bilan o‘yinda durang kifoya.
Bu ikki jamoadan tashqari, «Marsel» uchinchi o‘rinni hal qilgan. Ligani tark etgan uch jamoa ham aniq – «Trua», «Ayachcho» va «Anjye».
Yagona savol, YeChL yo‘llanmasini qo‘lga kiritadigan uchinchi jamoa qaysi bo‘ladi? «Monako»mi (65 ochko), «Lill»mi (63) yoki «Renn» (62)? Nazariy tomondan hatto «Lion» (59) ham da’vogar, ammo qiyin masala.
Navbatdagi turda «Renn» o‘z maydonida «Monako»ni qabul qiladi. G‘alaba mezbonlarga «Monako»ga ochkolar bo‘yicha yetib olishni, to‘plar nisbatiga ko‘ra esa, quvib o‘tishni ta’minlaydi. Ammo «Renn» uchun bu yetarli emas, chunki, vaziyatdan «Lill» ham foydalanishi va g‘alaba qozonib, so‘nggi tur oldidan 66 ochko bilan 4-o‘ringa chiqib olishi mumkin. Demak «Lill» uchun ushbu markaziy o‘yinda durang bo‘lishi yoki mehmonlarning g‘alaba qozonishi juda muhim. Faqat shu natijalar tur yakunida «Lill»ni to‘rtlikka kirib olishiga yordam beradi. «Monako»ning g‘alabasi esa, qirollik klubini bu kurashda favoritga aylantiradi va so‘nggi turda barchasi o‘z qo‘lida qoladi.
