Namangan viloyatining Pop tumani hududidan o‘tgan A-373 avtomobil yo‘lida yirik yo‘l-transport hodisasi sodir bo‘ldi. Favqulodda vaziyatlar vazirligi holat yuzasidan rasmiy ma’lumot taqdim etdi.
Bugun, 27 may kuni soat 15:25 larda A-373 avtomobil yo‘lining Qamchiq dovoni 250-kilometrida «Toshkent-Vodiy» yo‘nalishida harakatlanib ketayotgan «Isuzu» yuk avtomashinasining tormoz qismi ishlamay qolgan.
Ushbu holat oqibatida haydovchi boshqaruvni yo‘qotgan va shu yo‘nalishda turgan Kia, «Damas» va 2 ta «Kobalt» avtomashinalariga urilib, ovqatlanish maskani hududidagi favvoraga borib tushgan.
Dastlabki ma’lumotlarga ko‘ra, yo‘l-transport hodisasi oqibatida bir nafar fuqaro vafot etgan va uch nafar fuqaro tan jarohati bilan Pop tumani shifoxonasiga yuborilgan.
Voqea joyiga FVV qutqaruvchilari va tegishli tashkilotlar vakillari yetib borgan. Hozirda vaziyat oqibatlari bartaraf etilmoqda.
Mazkur holat yuzasidan dastlabki tergov oldi surishtiruv ishlari olib borilmoqda.
