Qashqadaryoda mahalliy bloger qamaldi. U SChR bo‘yicha yig‘ilishni yoritmoqchi bo‘lgani aytilmoqda

Qashqadaryoda faoliyat yurituvchi bloger Elmurod Odilov Yakkabog‘ tumanida fermerlar ishiga aralashganlik aybi bilan 15 sutkaga qamaldi.

Oliy sud axborotiga ko‘ra, jinoyat ishlari bo‘yicha Yakkabog‘ tuman sudining 2023 yil 27 maydagi qaroriga asosan, Odilov MJtKning 183-moddasi (mayda bezorilik) va 198-moddasi (hokimiyat vakilining qonuniy talablarini bajarmaslik yoki xizmat vazifalarini bajarishiga to‘sqinlik qilish) 1-qismida nazarda tutilgan huquqbuzarliklarni sodir qilgan deb topilib, unga 15 sutka ma’muriy qamoq jazosi tayinlangan.

Qashqadaryo viloyati IIB axborot xizmatining ma’lum qilishicha, 26 may kuni taxminan soat 22:30 atrofida Yakkabog‘ tumani «Ibn Sino» MFY hududidagi pilla saqlash omborxonasiga pillalarni qabul qilib olish jarayoni vaqtida o‘zini «Elmurod blog» deb tanishtirgan fuqaro Elmurod Odilov kelgan.

«Shu yerda fermerlarning ishiga aralashib, ularga turli nomunosib savol-javoblar qilishi oqibatida o‘rtalarida janjal kelib chiqqan. Ushbu jarayonda bloger fermerlarni haqorat qilgan. Pilla yetishtiruvchi fermerlar blogerning xatti-harakatlari yuzasidan Yakkabog‘ tuman IIBga murojaat qilgan. Odilovga nisbatan Ma’muriy javobgarlik to‘g‘risidagi kodeksning qator moddalari bilan ma’muriy bayonnoma rasmiylashtirilgan», deyiladi viloyat IIB axborotida.

Daryo nashri esa bloger avvaliga pilla punktida IIB xodimlari tomonidan ayovsiz kaltaklangani haqida yozdi. Nashr muxbirining aniqlashicha, kaltaklangan bloger Yakkabog‘ tumani hokimi o‘rinbosari Fozil Xidirovning yoshlar yetakchilariga bergan topshiriqlari ijrosiga bag‘ishlangan yig‘ilishini yoritishga uringan, lekin to‘siqqa uchragan.

Nashr keltirgan skrinshotda, “Xidirov Fozil Keldiyarovich” ismli Telegram foydalanuvchisi barcha mahallalardagi yoshlar yetakchilariga murojaat qilgani ko‘rinadi.

“Hamma o‘zining hududidan bittadan schr (1 oylik harbiy xizmatga) fuqaroni topib, pulini to‘latib bormasa, vazifasidan ozod etishgacha bo‘lgan choralar ko‘riladi. Shu topshiriqqa mas’uliyat bilan qaranglar. Yig‘ilishga – pillaga soat 20:00da yetib boringlar”, – deya yozilgan skrinshotda.

Safarbarlik chaqiruvi rezerviga odam topish majburiyati

O‘zbekistonda yoshiga yetgan fuqarolarni safarbarlik chaqiruv rezerviga (SChR) jalb etishda maktab direktorlari, fermer xo‘jaliklari rahbarlari va boshqa budjet tashkilotlarini jalb etish holatlari uchrab turadi.

2019 yilda Urgut tumani hokimi tumandagi barcha maktab direktorlariga SChRga jalb qilish uchun bir nafardan odam topish va ularning pullarini to‘lab berish topshirig‘ini bergandi.

Urgutdagi bu muammo keyingi yillarda ham barham topmadi: 2021 yilda tumanda ishlovchi shifokorlar va pedagoglar SChRga odam topish va ularning pullarini to‘lab berishga majburlayotgani haqida murojaat qilgan. Oliy Majlis deputatlari Navro‘z Rizayev va G‘ayrat Abdiyev o‘zlariga ham shu taxlit murojaat bo‘lganini aytishgandi. O‘shanda tuman hokimligi axborot xizmati bu holatni rad etib chiqqandi.

Ma’lumot uchun, SChRga qabul qilingan fuqarolar BHMning 20 barobari (ayni damda 6 600 000 so‘m) to‘lov qiladi.

2021 yil 27 avgust kuni Senat yalpi majlisida “Umumiy harbiy majburiyat va harbiy xizmat to‘g‘risida”gi qonun muhokama qilingan. Muhokama chog‘ida senatorlar fuqarolar tomonidan SChRga xizmat safiga olingan shaxslar to‘laydigan pul badallari miqdori yuqori ekani haqida turli e’tirozlar bo‘layotganini bildirishgan.

Senat raisi Tanzila Norboyeva bu badal miqdorini yoki arzonlashtirish, yoki muqobil variantini topish yuzasidan Mudofaa vazirligi mas’ullariga ikki hafta muddatda Vazirlar Mahkamasiga tegishli takliflarni kiritish yuzasidan topshiriq bergandi.

Topshiriqning keyingi taqdiri nima bo‘lgani noma’lum, biroq safarbarlik chaqiruvi rezervidagi xizmat safiga olingan shaxslar to‘laydigan pul BHMning 20 barobari miqdorida saqlanib turibdi.