O‘zbekiston va Misr Navoiy viloyatida sanoat zonasi tashkil etadi

O‘zbekiston investitsiyalar, sanoat va savdo vaziri Laziz Qudratov Misrning Orascom Construction kompaniyasining sanoat parklarini tashkil etish va qurilish materiallari ishlab chiqarish bo‘limi rahbari Omar Bebars boshchiligidagi delegatsiya bilan uchrashdi.

Investitsiyalar, sanoat va savdo vazirligi ma’lumotiga ko‘ra, suhbat chog‘ida Misr delegatsiyasining bir kun avval soha birlashmalari rahbarlari va mahalliy hokimiyat organlari bilan o‘tkazgan qator ishchi uchrashuvlari yakunlari sarhisob qilindi. Navoiy viloyatida tayyor elektrotexnika, to‘qimachilik va farmatsevtika mahsulotlari ishlab chiqaruvchi korxonalarni joylashtirish uchun sanoat zonasini tashkil etish loyihasini amalga oshirish imkoniyatlari o‘rganildi.

Shuningdek, kompaniya Toshkent, Andijon, Qashqadaryo va Namangan viloyatlarida tayyor to‘qimachilik mahsulotlari ishlab chiqarishga ixtisoslashgan yangi sanoat parklarini boshqarishda ishtirok etish rejalari bilan o‘rtoqlashdi. Kompaniya vakillariga mamlakatimizga o‘z sarmoya, tajriba va innovatsion ishlanmalarini olib kirishda har tomonlama yordam ko‘rsatishga tayyorlik bildirildi.