Mali BMT tinchlikparvar kuchlarini mamlakatdan olib chiqib ketishni talab qildi

Mali tashqi ishlar vaziri Abdulayye Diop 16 iyun, juma kuni BMT Xavfsizlik kengashidan BMTning Malidagi ko‘p o‘lchovli integratsiyalashgan barqarorlashtirish missiyasi tinchlikparvar kuchlarini “zudlik bilan” mamlakatdan chaqirib olishni talab qildi. Diopning so‘zlariga ko‘ra, BMT tinchlikparvar missiyasi mamlakatdagi vaziyatni yanada xavfsizroq qila olmadi va bundan tashqari, o‘z harakatlari tufayli mamlakat aholisida “ishonchsizlik hissi” paydo bo‘ldi.

“Barqarorlashtirish missiyasi muammoning bir qismiga aylanib, jamiyatdagi keskinlikni kuchaytirib, Malida tinchlik, yarashuv va milliy birlikka katta zarar yetkazyapti”, dedi tashqi ishlar vaziri Xavfsizlik kengashi yig‘ilishida. Uning aytishicha, mamlakat hukumati BMT bilan muzokaralar o‘tkazishga tayyor, biroq tashkilot bosh kotibi Antoniu Guterrishning missiya mandatini o‘zgartirish bo‘yicha barcha takliflarini rad etgan.

Barqarorlashtirish missiyasi rahbari El Gassim Vane, o‘z navbatida, rasmiylari rozi bo‘lmagan mamlakatda missiyani davom ettirish "deyarli imkonsiz" ekanligini aytdi.

Birlashgan Millatlar Tashkiloti vakillari so‘nggi paytlarda Malida xavfsizlik va inson huquqlari bilan bog‘liq vaziyat yomonlashganini qayta-qayta qayd etishgan. Yanvar oyida BMTning inson huquqlari bo‘yicha ekspertlari "Vagner" XHK va Mali hukumati kuchlari faoliyatini, jumladan, tinch aholini qirg‘in qilish ehtimolini mustaqil tekshirishga chaqirgan edi. Bayonotda aytilishicha, 2021 yildan buyon ekspertlar Malidan qatl qilish, qiynoqlar, ommaviy qabrlar, zo‘rlash, noqonuniy hibsga olishlar va zo‘rlik bilan g‘oyib bo‘lishlar haqida doimiy ravishda bezovta qiluvchi xabarlar olmoqda.