Qashqadaryoda qo‘lbola gazli suv tayyorlash uskunasi portlashi oqibatida bir kishi halok bo‘ldi

Qashqadaryoda qo‘lbola gazli suv tayyorlash uskunasi portlashi bilan bog‘liq noxush hodisa sodir bo‘lgan. Bu haqda viloyat IIB axborot xizmati xabar bermoqda.

Hodisa 2023 yil 15 iyun kuni soat 12:00 larda Kitob tumani dehqon bozori oldida sodir bo‘lgan.

Kitob tumani “Guliston” MFYda yashovchi fuqaroga tegishli qo‘lbola usulda yasalgan gazli suv tayyorlovchi uskunaning suv saqlash idishiga kislorodli ballondan ko‘p bosim berilgani tufayli u yorilib, portlash sodir bo‘lgan.

Oqibatda, Kitob tumani va Shahrisabz shahrida yashovchi 2 nafar fuqaro tan jarohati olib shifoxonaga yotqizilgan. Shifokorlar tomonidan ko‘rsatilgan tibbiy muolajalarga qaramasdan ulardan biri vafot etgan.

Qayd etilishicha, holat yuzasida Kitob tuman IIB huzuridagi tergov guruhi tomonidan Jinoyat kodeksining 259-moddasi 2-qismi “a” bandi asosida jinoyat ishi qo‘zg‘atilib, dastlabki tergov harakatlari olib borilmoqda.

Avvalroq, Farg‘ona shahri Qirguli mavzesi Yangi asr ko‘chasida 27 may kuni soat 10:00 lar chamasida gazli suv sotish shoxobchasida uglerod qo‘shoksidi gazi to‘ldirilgan ballon portlagan. Oqibatda gaz suv sotish bilan mashg‘ul bo‘lgan 12 yoshli bola va uning otasi tan jarohatlari olib shifoxonaga yotqizilgandi.