Saudiya Arabistonida ruxsatnomasiz Haj qilmoqchi bo‘lgan 17 mingdan ortiq odam ushlandi

Saudiya Arabistoni xavfsizlik idoralari Haj ziyoratini ruxsatnomasiz bajarishga uringan 17 mingdan ortiq odamni aniqladi, deb xabar berdi Arab News.

Jamoat xavfsizligi direktori va Haj xavfsizligi qo‘mitasi rahbari general-leytenant Muhammad al-Bassamiy so‘zlariga ko‘ra, jami 17615 kishi, jumladan, yashash, ish va chegara xavfsizligi qoidalarini buzgan 9509 nafar, shuningdek, 105 ta soxta Haj kampaniyasi tashkilotchilari qirollikning turli mintaqalarida hibsga olingan. Ularning ishi prokuraturaga o‘tkazildi.

Shu bilan birga, Haj qilish uchun ruxsatnomasi bo‘lmagan 203 mingga yaqin kishi Makkaga kiritilmagan, Makka va muqaddas joylarga kirish uchun ruxsatnomasi bo‘lmagan 129 mingga yaqin avtomobil ham qaytarilgan.

Al-Bassamiy so‘zlariga ko‘ra, Hajga ruxsati bo‘lmagan ziyoratchilarni olib ketayotgan 33 kishi hibsga olinib, huquq-tartibot idoralariga topshirilgan.

Avvalroq, Saudiya Arabistoni 2023 yilda 1,8 mln kishi Haj ziyoratini amalga oshirganini ma’lum qilgan edi.