O‘zbekiston va Qozog‘iston ikki tomonlama hamkorlik masalalarini ko‘rib chiqdi

Senat raisining birinchi o‘rinbosari Sodiq Safoyev Qozog‘iston parlamenti Senati qo‘mitasi raisi Askar Shakirov bilan uchrashdi.

Foto: Dunyo

Parlament yuqori palatasi ma’lumotiga ko‘ra, prezidentlik saylovida xalqaro kuzatuvchi sifatida ishtirok etayotgan Askar Shakirov so‘nggi yillarda O‘zbekistonda amalga oshirilayotgan islohotlar, ayniqsa yaxshi qo‘shnichilik, parlamentlararo hamkorlik borasidagi ishlar yuzasidan o‘z munosabatini bildirdi.

Tomonlar muloqot davomida, shuningdek, Senat raisi Tanzila Norboyevaning Qozog‘istonga rasmiy tashrifi chog‘ida erishilgan kelishuvlarni amalga oshirish masalalarini ko‘rib chiqdi.

Savdo-iqtisodiy hamkorlikning asosiy yo‘nalishlari, Orol mintaqasidagi suv muammosini hal etish, suv resurslaridan oqilona foydalanish kabi masalalar, qo‘shma loyihalarni amalga oshirish bo‘yicha takliflar muhokama qilindi.