Abdulla Aripov Gurjistonga tashrif buyuradi

Rasmiy kutib olish marosimi Tbilisidagi hukumat ma’muriyatida bo‘lib o‘tadi. 

Tashrif doirasida O‘zbekiston bosh vaziri va uning gurjistonlik hamkasbi Irakliy Garibashvili o‘rtasida yuzma-yuz va kengaytirilgan tarkibda uchrashuv rejalashtirilgan. 

Avvalroq O‘zbekiston Gurjiston portlari orqali Yevropa va Amerika mamlakatlariga yuklarni uzluksiz tashishni ta’minlash niyatida ekani haqida xabar berilgan edi. 

O‘zbekiston Transport vazirligi xabariga ko‘ra, Gurjiston iqtisodiyot va barqaror rivojlanish vaziri o‘rinbosari Guram Guramishvili bilan uchrashuvda O‘zbekiston eksport va import tovarlarini Gurjiston portlari orqali Yevropa va Amerika davlatlariga tashishni tashkil etish masalalari muhokama qilingan.

Uchrashuvda yuk tashish narxi va muddatlarini pasaytirish, tarif imtiyozlarini kengaytirish masalalari ham ko‘rib chiqilgan. 

Bundan tashqari, Poti va Batumi portlari infratuzilmasidan samarali foydalanish yuzasidan fikr almashildi. Uchrashuvlarda muhokama qilingan hamkorlik yo‘nalishlari doirasida tomonlar kelgusida amalga oshirilishi lozim bo‘lgan vazifalarni belgilab oldi.