Rossiyaning eng yaxshi universitetlari «harbiy» kvota bo‘yicha 800 dan ortiq kishini qabul qildi

800 dan ortiq kishi Ukrainaga qarshi urush qatnashchilari va ularning bolalari uchun kvotalar bo‘yicha Rossiyaning eng yaxshi universitetlariga o‘qishga kirdi. Ularning aksariyati yagona davlat imtihonidan tegishli ballardan past ball to‘plagan yoki umuman o‘ta olmagan, deb xabar berdi «Vajnyye istorii» surishtiruv nashri 9 avgust, chorshanba kuni. 

Jurnalistlar 9 avgustga qadar Rossiyaning 15 ta eng yaxshi universitetidan 13 tasining saytlarida jahon standartlari bo‘yicha e’lon qilingan bakalavriat va mutaxassislik bo‘yicha kunduzgi bo‘limga o‘qishga qabul qilish bo‘yicha buyruqlarni tahlil qildi. Imtiyozga ega bo‘lganlarning aksariyati Oliy iqtisodiyot maktabi (OIM), Moskva davlat universiteti (MDU) va Ural federal universitetiga o‘qishga kirdi. Bunday kvota bo‘yicha ta’limning budjet shakliga jami kamida 833 kishi qabul qilindi.

Har to‘rtinchi shaxs (203 kishi) budjetga «kirish imtihonlarisiz» kirgan. Nashrning yozishicha, kvota bo‘yicha kirganlardan 429 nafari imtiyozsiz o‘qishga kirish uchun belgilanganidan ham yomonroq imtihon topshirgan. Bunday ballar bilan ular o‘qishga kirgan fakultetlarga qabul qilinmagan bo‘lardi, deya ta’kidlaydi «Vajnyye istorii».

O‘qishga kirgan «imtiyozli talabalar» nimani o‘rganadi?

Jurnalistlar, shuningdek, «alohida kvota» bo‘yicha o‘qishga kirganlar Moskva davlat universitetida «Amerika va Afrika tadqiqotlari», Oliy iqtisodiyot maktabida «Iqtisodiy jinoyatlarni tergov qilish», Sankt-Peterburg davlat universitetida «Akademik qo‘shiqchilik», Bauman nomidagi Moskva davlat texnika universitetida «o‘q-dorilar va portlatkichlar», «raketa qurollari» va «kosmonavtika» yo‘nalishida tahsil olishlariga e’tibor qaratdi.

Ayni paytda, «Bumaga» surishtiruv nashri Peterburgda kamida 1177 kishi harbiy imtiyozlardan foydalanishga uringanini xabar qildi. Ulardan 47 nafarining ota-onasi Ukrainada jang qilmoqda, deb yozadi nashr. Abituriyentlar asosan IT-yo‘nalishlariga (344 kishi) kirishni xohlagan. Yana 310 nafar abituriyent amaliy matematika, fizika va kimyoviy texnologiya yo‘nalishida o‘qish istagini bildirgan. «Bumaga» hisob-kitoblariga ko‘ra, kamida 261 kishi Sankt-Peterburg universitetlariga «alohida kvota» bo‘yicha o‘qishga kirgan. 

Rossiya fan va oliy ta’lim vaziri o‘rinbosari Dmitriy Afanasevning so‘zlariga ko‘ra, Ukrainadagi urush qatnashchilari va ularning oila a’zolaridan universitetga o‘qishga kirish uchun 9000 dan ortiq ariza kelib tushgan, 7000 ga yaqin kishi ustuvor tartibda o‘qishga qabul qilingan. Unga ko‘ra, oliy o‘quv yurtlari har bir murojaatni alohida ko‘rib chiqqan va kerak bo‘lsa, kvotadan o‘ta olmagan abituriyentlarga o‘z mablag‘lari hisobidan joy ajratgan.