Varshavada mingdan ortiq belaruslik ishtirokida aksiya o‘tkazildi

9 avgust, chorshanba kuni Varshavada Yevropa Ittifoqi soxtalashtirilgan deb hisoblagan Belarusdagi prezidentlik saylovlari va undan keyingi norozilik va repressiyalarning uch yilligiga bag‘ishlangan «Dzen salіdarnassі» aksiyasiga mingdan ortiq namoyishchi chiqdi. 

Mitingda 2020 yilda mashhur bo‘lgan shiorlar yangradi, ulardan biri: «Biz unutmaymiz, kechirmaymiz», deya xabar bermoqda DW muxbiri. Ishtirokchilar Ukrainadagi urushga qarshi chiqdi va noqonuniy sudlanganlarni ozod qilishga chaqirdi. Huquq faollariga ko‘ra, Belarusda 1500 ga yaqin odam siyosiy mahbus deb tan olingan.

Belaruslik muxolifatchi Pavel Latushko mitingda rejimga nisbatan sanksiyalar bosimini davom ettirish va Aleksandr Lukashenkoni hibsga olish uchun xalqaro order berilishini talab qilish zarurligini aytdi. 

Gdanskdagi aksiya 

Xuddi shunday aksiya Gdanskda ham bo‘lib o‘tdi. Ishtirokchilar shaharning tarixiy markazidan Yevropa birdamlik markazigacha piyoda yurib keldi. DW muxbirining so‘zlariga ko‘ra, aksiyada 500 ga yaqin odam to‘plangan. Mitingda belarus shoiri Andrey Xadanovich ishtirok etdi. 

Shuningdek, tadbirlar Litva, Gurjiston, Chexiya, Shveytsariya, Buyuk Britaniya, AQShda bo‘lib o‘tdi. 

Tixanovskaya: Biz hech qayerga ketmaymiz 

Belarus muxolifati yetakchisi Svetlana Tixanovskaya Vilnyusdagi mitingda nutq so‘zladi, deb xabar beradi Belarusning Zerkalo.io («Zerkalo») internet portali. 

«Biz xalqimiz bilan faxrlansak bo‘ladi. Xalqimiz ozodlikka irodasini namoyon etdi, - dedi u. - Uch yildan beri bu iroda yo‘qolmadi. Repressiyalarga qaramay. Ommaviy majburiy muhojirlikka qaramay. Men dushmanlarimizga aytmoqchiman: biz hech qayerga ketmaymiz».

Avvalroq, DW nashriga bergan intervyusida prezidentlikka sobiq nomzod Tixanovskaya: «Ukraina g‘alaba qozonishi kerak va u g‘alaba qozonadi, keyin belaruslar uchun yangi imkoniyatlar oynasi ochiladi», deb ta’kidladi.