Angliyada top-uchrashuvlar, Ispaniyada klasiko, Germaniyada final. Hafta o‘yinlari anonsi

Aslida futbolni sog‘ingan muxlislar uchun anons shart emas, har qanday o‘yin ham mavsum boshidagi murosasizlik, ham yangi transferlarga baho berish nuqtayi nazaridan o‘ziga yarasha qiziq bo‘lsa-da, an’anadan chekinmagan holda ba’zi o‘yinlarga alohida to‘xtalishni lozim topdik.

BYoRNLI – MANCheSTeR SITI (11 avgust, 23:59)

APL yangi mavsumi ustoz va shogird bahsi bilan boshlanadi. Gap bu yerda Kompanining bir necha mavsum Pep Gvardiola qo‘l ostida o‘ynaganida ham emas. Chempionshipda «Byornli» o‘yinlarini kuzatgan aksariyat muxlis va mutaxassislar jamoa Shon Daychning eski «Byornli»sidan ancha o‘zgargani, liganing o‘ziga xos «siti»siga aylanganini aytishgandi. Juda ko‘p ko‘rsatkichlarda «Byornli» rostanam Chempionshipda yaqqol ustunlik qildi. Aksariyat notanish futbolchilardan iborat tarkib bilan Kompani juda yaxshi jamoa tuza olganini bu safar yuqoriroq darajada isbotlashi kerak bo‘ladi.

Tabiiyki, transferlar ham bo‘ldi. Xususan, Natan Redmond APL muxlislariga yaxshi tanish nom. Futbolchi «Sauthempton» tarkibidagi qariyb 7 yildan so‘ng, bir mavsum Turkiyada o‘ynab keldi va erkin agent sifatida Kompani jamoasiga kelib qo‘shildi. Shuningdek, 19 million yevro evaziga «Bazel»dan kelib qo‘shilgan Zeki Amduni ham yil kashfiyotlaridan bo‘lishi mumkin. 22 yoshli futbolchi Shveytsariyada ancha sermahsul o‘yin ko‘rsatgan.

«Manchester Siti» o‘tgan hafta Superkubokni «Arsenal»ga boy berib qo‘ydi. Ammo bu «shaharliklar» uchun fojia emas, zero Gvardiola jamoasi mavsumga asta-sekinlik bilan kirib kelib, asosan qishga borib kuchayishi yangilik bo‘lmay qoldi. Superkubok bahsini ham uchinchi yildirki «Manchester Siti» yutqazadi. Darvoqe, kelasi chorshanba kuni Gvardiola shogirdlari UYeFA Superkubogi uchun «Sevilya» bilan bahs olib boradi. Mazkur sovrin 1972 yili, ya’ni «Manchester Siti» Kubok egalari kubogini yutganidan ikki yil o‘tib ta’sis etilganini e’tiborga olsak, bu o‘yin klub uchun o‘z tarixidagi dastlabki UYeFA Superkubogi o‘yini bo‘ladi.

O‘zaro o‘yinlarga to‘xtaladigan bo‘lsak, so‘nggi 11 o‘yinda «Manchester Siti» g‘alaba qozongan, oxirgi 7 o‘yinda umuman «Byornli» gol ham ura olmagan. Aynan Kompani boshchiligidagi «Byornli» o‘tgan yili quyi ligada qatnashgan bo‘lsa-da, Angliya kubogi chorak finalida «Manchester Siti»ga duch kelgandi. O‘sha o‘yinda «shaharliklar» «Etihad»da 6:0 hisobida ustun kelgan, Erling Holand esa, het-trikka erishgandi.

NYuKASL – ASTON VILLA (12 avgust, 21:30)

Murosasizlik va drayv nuqtayi nazaridan haftaning eng e’tiborli uchrashuvi Nyukaslda bo‘lib o‘tsa kerak. «Nyukasl» deyarli top-klubga aylandi, bu safar Chempionlar Ligasida to‘p suradi. Tarkibni saqlab qolish bilan bir qatorda, Tonali, Livremento hamda Barns kabi yangi futbolchilarni xarid qildi. Mavsumoldi o‘rtoqlik o‘yinlarini ajoyib o‘tkazdi – 5 g‘alaba va 2 durang. Mag‘lubiyat yo‘q. Xususan, uch kun oldin «Vilyarreal» 4:0 hisobida dog‘da qoldirildi. Harvi Barns dublga erishdi.

«Aston Villa» esa, agar Unai Emeri kelgan paytdan boshlab hisoblasak, Angliyada eng ko‘p ochko to‘plagan jamoalardan biridir. Shuningdek, klub transfer bozorida ham juda faol bo‘ldi va e’tiborli xaridlarni amalga oshirdi. Tarkibga o‘tgan yillarda top-klublar e’tiborida bo‘lgan ispaniyalik markaziy himoyachi Pau Torres, «Lester» yetakchilaridan biri Yuri Telemans, shuningdek, «Bayyor»dan universal hujumchi Musa Diabi kelib qo‘shildi. O‘tgan mavsumdagi tarkib ham saqlanib qolgan.

Qizig‘i, birminghemliklar ham mavsumoldi o‘rtoqlik o‘yinlarini mag‘lubiyatsiz o‘tkazdi. Ayniqsa, «Valensiya», «Latsio» kabi jamoalar ustidan qozonilgan ishonchli g‘alabalar Emeriga yangi mavsumga ijobiy tomondan qarash imkonini beradi. Ingliz mutaxassislari ichida «Aston Villa» hatto kuchli to‘rtlikka kirishini taxmin qilayotganlar ham bor.

Mana shu ikki ko‘tarinki kayfiyatdagi klub birinchi turdayoq bir-birini imtihondan o‘tkazadi. Ikki hafta oldin o‘rtoqlik o‘yinida jamoalar bahslashib ko‘rishgan, uchrashuv 3:3 hisobida yakunlangandi. O‘zaro o‘yinlar haqida gap borsa, tabiiyki, o‘tgan mavsum oxiridagi o‘yin yodga keladi. O‘shanda «Aston Villa» «Nyukasl» ustidan sovuq suv quyib yuborib, o‘z maydonida 3:0 hisobida ustun kelgandi. «Sent-Jyeyms Park»dagi o‘yinlar tarixiga nazar tashlasak, «Aston Villa» ushbu stadionda 2005 yildan beri g‘alaba nimaligini bilmay kelmoqda.

Jarohatlar borasida «Nyukasl» faqat Jo Uillok va Fabian Sherning yordamidan foydalana olmasa, «Aston Villa» lazaretidagilar ro‘yxati ancha uzun. O‘tgan mavsum oxirida jarohat olgan va mavsumoldi yig‘inlarini o‘tkazib yuborib, hali safga qaytmagan futbolchilar bor – Aleks Moreno, Bertran Traore, Emiliano Buendiya, Yakob Remzi, Leander Dendonker.

BAVARIYa – RB LeYPsIG (12 avgust, 23:45)

Bundesliga o‘yinlari kelasi haftadan boshlansa-da, shanba oqshomida Germaniya Superkubogi uchun uchrashuv bo‘lib o‘tadi. Butun Yevropa Harri Keynning «Bavariya»ga transferini muhokama qilayotgan paytda, «Bavariya» navbatdagi sovrin uchun «Leypsig»ga qarshi maydonga tushadi. Xuddi shu jamoalar o‘tgan yili ham aynan shu sovrin uchun kuch sinashgan va «Bavariya»ning qo‘li baland kelib, 5:3 hisobida ustun kelgandi.

Ligadagi o‘yinlarda esa «Leypsig» ustunlik qilgan, hatto so‘nggi turlarda Myunxenda 3:1 hisobida g‘alaba qozongan mehmonlar chempionlikni «Borussiya»ga deyarli sovg‘a qilayozgandi. Yakunda dortmundliklar kerakli g‘alabani so‘nggi turda qo‘lga kirita olmadi va baribir «Bavariya» chempionlikka erishdi.

Tomas Tuxel o‘tgan mavsum oxirida kelganini e’tiborga olsak, murabbiyning to‘laqonli faoliyati endi boshlanmoqda, tabiiyki, jamoada yangiliklar bo‘lishi tabiiy. «Napoli»dan Kim, «Borussiya»dan Gerreyru, «Leypsig»dan Laymer kelib qo‘shildi, Mane, Zommer, Kanselu, Luka Ernandes, Blind ketdi.

«Leypsig»da aksincha, yo‘qotishlar salmoqliroq – Yoshko Gvardiol rekord summaga «Siti»ga, Soboslai «Liverpul»ga yo‘l oldi, Nkunku Londonga ketishi o‘tgan mavsumdayoq kelishilgandi. Andre Silva bir yillik ijara asosida «Real Sosedad» tarkibida to‘p suradi. Kelganlar u qadar nomdor emas, zero aynan mana shu uslubda har yili yulduzlar «ishlab chiqarib» sotish aksariyat nemis klublarining yo‘nalishi bo‘lib qoldi. Faqat «Liverpul»dan ijara asosida kelgan Fabio Karvaloni Bundesligada kuzatish qiziqish uyg‘otishi tabiiy.

Germaniya Superkubogini 1994 yilda «Verder» klubi «Bavariya» ustidan g‘alaba qozonib, qo‘lga kiritgandi. O‘shandan buyon asosan «Bavariya», ba’zi yillarda «Borussiya» (4 marta) qo‘lga kiritib kelmoqda. «Leypsig»da qariyb o‘ttiz yildan buyon davom etib kelayotgan an’anani buzish, shuningdek, Germaniya Superkubogini qo‘lga kiritgan ilk sharqiy Germaniya klubi bo‘lish imkoniyati bor. Kuzatamiz.

ATLeTIK – ReAL MADRID (13 avgustga o‘tar kechasi, 00:30)

La Ligada «el klasiko» deb asosan «Real» va «Barselona» o‘rtasidagi o‘yinlar atalsa-da, «Atletik»ning bu ikki grand bilan o‘yinlari ham shunday nomga haqli, zero ispan tilli mamlakatlarda ligani tark etmagan jamoalar o‘yinlariga nisbatan aynan shu atama qo‘llanadi. Ispaniyada bunday jamoalar uchta. Kimligini payqadingiz.

Umuman bilbaoliklarning «Real» bilan bahslari hatto «Barselona» bilan qarama-qarshilikdan ham ko‘hnaroq, shuning uchun «Eski klasiko» deb ham aytishadi. Roppa-rosa 120 yil oldin, hozirda Ispaniya kubogi deb ataladigan musobaqa bo‘lmish «Kopa de la Rey»ning ilk finalida, hali Ispaniya chempionati paydo bo‘lmasdan ham avvalroq, aynan «Real» va «Atletik» o‘zaro bahslashishgan. O‘yin Madridda bo‘lib o‘tgan. 2:0 hisobida birinchi bo‘limni o‘z foydasiga hal qilgan mezbonlar keyin 2:3 hisobida yutqazib qo‘ygan. Ushbu g‘alaba Madridda tahsil olayotgan baskoniyalik talabalarni shu qadar ruhlantirib yuborganki, ular Madridda ham xuddi shunday qizil-oq libosda o‘ynaydigan, xuddi shu nomdagi yana bir jamoaga asos solishadi. Qaysi jamoaligini payqadingiz.

Xullas, navbatdagi Ispaniya chempionati mana shunday tarixga ega bo‘lgan bahs bilan boshlanadi. Odatda Bilbao klubi so‘nggi yillarda «Real»ga munosib qarshilik qila olmayotgandek ko‘rinsa-da, alohida olingan muhim o‘yinlarda ancha murosasiz bo‘lganini ko‘ramiz, jumladan, o‘tgan yilgi Ispaniya kubogidan «Real» chiqarib yuborilgan, 2021 yil yanvarida Superkubok uchun o‘yinda ham «Atletik»ning qo‘li baland kelgan. Mavsumning ochilish o‘yini, buning ustiga mezbon Bilbao ekanini hisobga olsak, «Atletik» osonlikcha ochko bermasligi turgan gap.

Buning ustiga, «Real» kutilmaganda darvozabondan ayrildi. Tibo Kurtua deyarli mavsum oxirigacha safdan chiqdi. Bir yozda ham asosiy hujumchi va ham asosiy darvozabonidan ayrilgan «Real»ga oson bo‘lmaydi. Buni so‘nggi o‘rtoqlik o‘yinlari ham ko‘rsatib turibdi. «Real» avval «Barselona»ga (0:3), keyin esa, «Yuventus»ga (1:3) imkoniyatni boy berib qo‘ydi.  

CheLSI – LIVeRPUL (13 avgust, 20:30)

«Chelsi» va «Liverpul» shundog‘am top-uchrashuv, klublarning Moyzes Kaysedo uchun ayovsiz kurashi o‘yinning yanada prinsipial ahamiyat kasb etishida rol o‘ynasa kerak. O‘tgan mavsumni nisbatan muvaffaqiyatsiz o‘tkazgan har ikki klub o‘xshash vaziyatda – ikkisi ham Chempionlar Ligasidan quruq qoldi va ikkisi ham, ayniqsa, yarimhimoyani butunlay yangilash ishlarini olib bormoqda. «Liverpul» so‘nggi yillardagi ustunlari bo‘lmish Milner, Henderson, Fabino, shuningdek Keytaga javob berib yuborgan bo‘lsa, «Chelsi»ni Kante, Kovachich, Maunt hamda Havers tark etdi. «Chelsi»ning nisbatan ko‘proq, «Liverpul»ning kamroq yangilangan tarkibini ko‘ramiz.

Bu yangilanish o‘zaro o‘yinlardagi muxlislar uchun biroz yoqimsiz an’anaga barham bersa ham ajab emas. «Chelsi» va «Liverpul» o‘rtasidagi oxirgi 4 o‘yin 0:0 hisobida yakunlangan. Bu to‘rt o‘yinning ikkitasi kubok finali ekani, ya’ni 120 daqiqadan davom etgani e’tiborga olinsa, jamoalar necha daqiqadan beri bir-birining darvozasini ishg‘ol qila olmayotganini hisoblayvering. Darvoqe, undan oldingi ikki o‘yin ham golli durang bilan yakunlangan. Oxirgi marta kimningdir g‘alabasi bilan tugagan o‘yin – 2021 yil martida «Chelsi» «Enfild»da 1:0 hisobida yutib qaytishi bo‘lgandi. O‘sha o‘yinda ishtirok etgan 26 o‘yinchining 18 nafari hozirda jamoalarni tark etib ulgurgani ham qisqa davr klublarni qanchalik o‘zgartirib yuborganini ko‘rsatadi.

Jarohatlarga to‘xtalsak, «Chelsi» safida Broyya va Maduekening tayyor bo‘lishi so‘roq ostida. Nkunku kamida uch oyga, Uesli Fofana esa undan ham ko‘proq vaqtga safdan chiqqan. Ayniqsa Nkunkuning jarohati Pochettino uchun eng katta yo‘qotish bo‘lishi kerak, chunki futbolchi yig‘inlarda asosiy futbolchi sifatida sinab ko‘rilayotgan va o‘rtoqlik o‘yinlarida uchta gol urishga ham ulgurgandi. Mehmonlar safida esa, doimgidek Tiago Alkantaraning holati noma’lum, u mavsumoldi yig‘inlarida deyarli ishtirok etmaganini inobatga olsak, Klopp hozircha undan foydalana olmaydi. Shuningdek, Bayjyetichda ham jarohat bor.

BOShQA O‘YINLAR

12 avgust. ARSeNAL – Nottinghem Forest (16:30), PSJ – Loryan (23:59)

13 avgust. Brentford – TOTTeNHEM (18:00), Xetafe – BARSeLONA (14 avgustga o‘tar kechasi, 00:30)

14 avgust. MYu – Vulverhempton (23:59)

Qahramon Aslanov tayyorladi