Kosmik kema bortida 80 yoshli britaniyalik hamda lotereyada parvozni yutib olgan Antigua va Barbudadan bo‘lgan ona va qiz bor edi. Parvoz davomiyligi 45 daqiqani tashkil qildi.
Milliarder Richard Brenson asos solgan Virgin Galactic kosmik kompaniyasi 10 avgust, payshanba kuni kosmik sayyohlardan iborat birinchi ekipajini koinot chekkasiga muvaffaqiyatli yetkazdi va ularni Yerga qaytardi. Parvoz kompaniyaning YouTube-kanalida translatsiya qilingan.
SpaceShipTwo (VSS Unity) boshqariladigan kosmik kemasi Nyu-Meksikodagi «Amerika» kosmodromidan havoga ko‘tarilgan WhiteKnightTwo egizak korpusli kuchaytiruvchi samolyotdan uchirildi. Kosmoletning tashuvchidan chiqarilishi 15 km balandlikda amalga oshirildi, shundan so‘ng u taxminan 88 km balandlikka ko‘tarildi, bu yerda vaznsizlik boshlanadi. Parvoz davomiyligi 45 daqiqani tashkil qildi.
Uch kosmik sayyoh
Bortda olti kishi - Virgin Galactic bosh astronavtlar yo‘riqchisi Bet Mozes, qo‘mondon Si Jyey Starkou, uchuvchi Kelli Latimer va uch sayyoh - Parkinson kasalligidan aziyat chekkan 80 yoshli sobiq britaniyalik sportchi Jon Gudvin, Keysha Shaxaff va uning qizi Anasteysha Mayyers bo‘lgan. So‘nggi ikkisi Antigua va Barbudadan bo‘lib, xayriya lotereyasida uchish huquqini qo‘lga kiritgan.
Kosmik kema parvozi Richard Brensonning qariyb 20 yil oldin sayyohlarni koinotga olib chiqish va ularga vaznsizlikni boshdan kechirish hamda Yer sayyorasini ko‘rish imkoniyatini berish haqidagi va’dasining yakuni bo‘ldi.
Bu Virgin Galactic uchun koinot chetiga ikkinchi tijorat parvoziga aylandi. 29 iyun kuni ushbu kompaniya olti kishidan iborat ekipajni muvaffaqiyatli uchirdi va Yerga qaytarib olib keldi, ular orasida ikki uchuvchi, Italiya HHK ikki xodimi, Italiya Milliy tadqiqot kengashi muhandisi va Virgin Galactic xodimi bor edi. Ular bir necha daqiqani vaznsizlikda o‘tkazdi. Bu tadqiqot missiyasi edi - italiyaliklar bir nechta tajribalar o‘tkazib qaytdi.
