Marokash zilziladan keyin to‘rtta davlatdan yordam qabul qildi

Kuchli zilziladan so‘ng Marokash hukumati to‘rtta «do‘st davlat» – Ispaniya, Qatar, Buyuk Britaniya va Birlashgan Arab Amirliklarining yordamini qabul qilishga tayyorligini ma’lum qildi, deb xabar berdi mamlakat Ichki ishlar vazirligi 11 sentabr, dushanbaga o‘tar kechasi.

Yuqorida qayd etilgan davlatlar qutqaruv xizmatlari vakillari allaqachon Shimoliy Afrikadagi qirollikda hamkasblari bilan bog‘langan, deb yozadi dpa agentligi. Avvalroq ko‘plab davlatlar, jumladan, AQSh va Germaniya, shuningdek, butun Yevropa Ittifoqi zilziladan jabr ko‘rgan mamlakatga yordam taklif qilgan edi.

Uch kunlik motam

So‘nggi ma’lumotlarga ko‘ra, Marokashdagi zilzila oqibatida kamida 2122 kishi halok bo‘lgan, yana 2421 kishi jarohatlangan. Bir kun avval fojia munosabati bilan Marokash qirollik saroyi mamlakatda uch kunlik motam e’lon qilgan edi.

9 sentabrga o‘tar kechasi 6,8 magnitudali zilzila sodir bo‘ldi. Marokash milliy geofizika instituti ma’lumotlariga ko‘ra, zilzila episentri Marrakeshdan 70 kilometr janubi-g‘arbda joylashgan Marrakesh-Safi tog‘li hududida joylashgan. AQSh Geologik xizmati ma’lumotlariga ko‘ra, zilzila o‘chog‘i 18,5 kilometr chuqurlikda joylashgan. Bu Marokashda so‘nggi 60 yildan ko‘proq vaqt ichida kuzatilgan eng kuchli zilzila bo‘ldi, deya qayd etadi dpa.