Samarqandda 10 ming dollarga fuqaroni qamoqdan chiqarib berishni va’da qilgan shaxs ushlandi

Samarqand viloyatida ehtiyot chorasini o‘zgartirib berish evaziga pul talab qilgan shaxs qo‘lga olindi. Bu haqda Bosh prokuratura huzuridagi departament xabar berdi.

Qayd etilishicha, departament hamda DXXning Past Darg‘om tumani bo‘limlari tomonidan tezkor tadbir o‘tkazilgan. Tadbirda A.O. ismli shaxs fuqaro M.Sh.ning ishonchiga kirib, uning turmush o‘rtog‘i A.U.ga nisbatan jinoyat ishi doirasida qo‘llangan qamoqqa olish ehtiyot chorasini tanishlari yordamida 10 ming dollar evaziga o‘zgartirib, qamoqdan chiqarib berishni va’da qilgani ma’lum bo‘lgan.

A.O. kelishilgan puldan 5 ming dollarni olgan vaqtida ashyoviy dalillar bilan ushlangan.

Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.