Buxorodagi Ark qo‘rg‘onida “Arxeologik park” ochildi

Endilikda sayyohlar “Arxeologik park”da qal’aning saqlanib qolgan asosini ko‘rib, ko‘hna Buxoro manzaralarini kuzatishlari, shuningdek, istaklariga ko‘ra arxeologik qazishma ishlarida bevosita ishtirok etishlari mumkin.

Foto: Buxoro viloyati hokimligi

22 sentabr kuni Buxoro shahridagi Ark qo‘rg‘onida yaratilgan “Arxeologik park”ning ochilish marosimi o‘tkazilgan. Bu haqda viloyat hokimligi xabar berdi.

Ma’lum qilinishicha, 1920 yil Buxoroni ishg‘ol etish paytida qadimiy qo‘rg‘onning uchdan ikki qismi butkul vayron qilingan. Shu boisdan mazkur hudud sayyohlar nazaridan “ihotalangan” edi. Oradan 103 yil o‘tib ayni kunda qariyb 4 gektar maydonni egallagan Ark qo‘rg‘onining vayronaga aylangan qismida xorijiy va mahalliy sayyohlar uchun yangi turistik maskan – “Arxeologik park” tashkil etildi.

Mazkur “Arxeologik park”da shahar mehmonlari qal’aning bugungi kungacha saqlanib qolgan asosini ko‘rib, qazishma ishlari bilan tanishishlari, Buxoro manzaralarini kuzatishlari hamda arxeologik qazishma ishlarida ham bevosita ishtirok etishlari mumkin.

YuNESKO tomonidan qo‘llab-quvvatlanib, Fransiyadagi mashhur Luvr muzeyi olimlari hamkorligida amalga oshirilayotgan mazkur loyiha doirasida qadimiy g‘isht bo‘laklari va toshlardan yo‘laklar, ayvonli shiypon barpo etilib, sayyohlar uchun qo‘shimcha qulayliklar yaratilmoqda. Restavratsiya va ta’mirlash-tiklash ishlari jarayonida Ark qo‘rg‘oni orqa tomonining chamasi 120 metrli devor qismi pishgan g‘isht bilan qoplangan.

Ma’lumot uchun, Buxoro hisori, ya’ni shaharning qadimgi qismi deya nom olgan “Ark” qo‘rg‘onining qurilish davri miloddan avvalgi IV asrga borib taqaladi.