Malida samolyot qulashi oqibatida «Vagner» jangchilari halok bo‘ldi

Malida harbiy samolyotning qulashi natijasida Mali askarlari va «Vagner» XHK jangchilari halok bo‘ldi. Rossiyada ishlab chiqarilgan Il-76 samolyoti 23 sentabr kuni Gao aeroportiga qo‘nayotganda uchish-qo‘nish yo‘lagidan chiqib ketib, halokatga uchradi, deb xabar berdi BMTning Malidagi missiyasi. Aeroport vakilining so‘zlariga ko‘ra, samolyotda haddan tashqari ko‘p yuk bo‘lgan.

Halokatga uchragan Il-76 Mali armiyasi va «Vagner» XHK yollanma askarlari tomonidan ishlatilgan. Samolyot halokati sabablari o‘rganilmoqda. Diplomatik manbalarga ko‘ra, samolyot bortida Mali askarlari va «Vagner» askarlari bo‘lgan, qurbonlar soni va moddiy zarar ko‘p ekani aytiladi.

Gao aeroportidan Mali askarlari va «Vagner» XHK yollanma askarlari, shuningdek, BMTning Malidagi barqarorlashtirish missiyasi (MINUSMA) harbiy xizmatchilari foydalanadi. Rasmiy manbalarda samolyot halokati haqida ma’lumot yo‘q.

BMTning Malidagi missiyasi 

Malida ko‘p yillardan beri ekstremistlarning isyoni davom etmoqda. U 2012 yilda Mali shimolida boshlangan, keyinchalik Niger va Burkina-Fasoga tarqalgan. MINUSMA harbiylari 2013 yildan beri Malini tinchlantirish va tinch aholini himoya qilishda yordam berib kelmoqda. 

2021 yilda Malida davlat to‘ntarishi natijasida hokimiyat tepasiga harbiy xunta keldi. U zudlik bilan BMT tinchlikparvar kuchlarini mamlakatdan olib chiqib ketishni talab qildi. Xunta Rossiya va «Vagner» XHK jangchilari bilan faol hamkorlikda ishlaydi. Fransiya va Germaniya vagnerchilar BMT missiyasi ishiga xalaqit berayotganidan shikoyat qilib keladi.

Germaniya hukumati o‘tgan yili nemis askarlarini Malidan olib chiqishga qaror qildi, bu 2023 yil oxirigacha yakunlanishi kerak. Hozirda Malida Bundesverning yuzlab askari joylashgan.