Quruvchi massividagi portlashda jabrlangan uy egalariga yetkazilgan zarar qoplanadi - hokim

Sergeli tumanidagi omborxonada ro‘y bergan portlash tufayli shikastlangan uylar egalariga yetkazilgan zararlar qoplab beriladi. Bu haqda voqea joyiga yetib borgan Toshkent shahri hokimi Shavkat Umrzoqov ma’lum qilgan.

«Moddiy zarar 2-3 kun ichida qoplanadi, bu muammolarni hal qilamiz», degan hokim.

Ayni vaqtda voqea joyiga bosh vazir Abdulla Aripov va boshqa mas’ullar ham yetib borgan. Yong‘in maydoni, jabrlanuvchilar soni aniqlanmoqda.

Quruvchi massivida tezkor qutqaruv bo‘linmalari xodimlari chodirlar tikishgan, jarohatlanganlarga tibbiy yordam ko‘rsatilmoqda.

Ayni vaqtda yong‘inni o‘chirish ishlari davom etmoqda. Jarayonga mudofaa vazirligi vertolyotlari ham jalb etilgan.

Toshkent shahri hokimligi yong‘in bilan bog‘liq vaziyat nazorat ostida ekanini xabar qilgan. Shahar aholisi va mehmonlaridan agar bugun tunda ro‘y bergan hodisa yuzasidan savollar yoki murojaat bo‘lsa, 71 210−01−63 raqami orqali Toshkent shahar hokimligi matbuot xizmatiga murojaat qilish so‘ralgan.

«Toshkent metropoliteni» Sergelidagi portlash natijasida hududga yaqin bo‘lgan metropolitenning Yer usti halqa yo‘lining «Quruvchilar» bekatining me’moriy qismiga yengil shikast yetgani, bu holat yo‘lovchi va poyezdlar harakatiga ta’sir ko‘rsatmagani haqida xabar berdi.