Senatning 45-yalpi majlisi 29 sentabr kuni chaqiriladi

Joriy yilning 27 sentabr kuni Oliy Majlis Senati kengashining navbatdagi majlisi bo‘lib o‘tdi. Uni Senat raisi Tanzila Norboyeva olib bordi.

Majlisda Senatning qirq beshinchi yalpi majlisini 2023 yilning 29 sentabr kuni chaqirish to‘g‘risida qaror qabul qilindi.

Qayd etilganidek, video-konferens-aloqa tizimidan foydalangan holda o‘tkaziladigan yalpi majlisda qator masalalarni muhokama qilish rejalashtirilgan.

“Pedagogning maqomi to‘g‘risida”gi, “Farmatsevtika faoliyati takomillashtirilishi munosabati bilan ayrim qonun hujjatlariga qo‘shimcha va o‘zgartirishlar kiritish to‘g‘risida”gi, “Yer to‘g‘risidagi qonunchilik takomillashtirilishi munosabati bilan ayrim qonun hujjatlariga o‘zgartirish va qo‘shimchalar kiritish to‘g‘risida”gi, “O‘lchash vositalarini qiyoslashdan o‘tkazish sohasiga xususiy sektor jalb qilinishi munosabati bilan “Metrologiya to‘g‘risida”gi qonunga o‘zgartirish va qo‘shimchalar kiritish haqida”gi, “Jinoyat kodeksiga hamda Ma’muriy javobgarlik to‘g‘risidagi kodeksiga o‘zgartirish va qo‘shimchalar kiritish haqida”gi qonunlar shular jumlasidandir.

Shuningdek, yalpi majlisda “Qurolli kuchlar tizimida qonuniylikni ta’minlash bo‘yicha qo‘shimcha chora-tadbirlar belgilangani munosabati bilan “Prokuratura to‘g‘risida”gi qonunga qo‘shimcha va o‘zgartishlar kiritish haqida”gi, “Respublika ijro etuvchi hokimiyat organlarining yaxlit tizimi shakllantirilishi munosabati bilan ayrim qonun hujjatlariga o‘zgartirishlar kiritish to‘g‘risida”gi qonunlar muhokama qilinadi.

Bundan tashqari, senatorlar Oliy Majlisning Inson huquqlari bo‘yicha vakili (ombudsman) o‘rinbosarini saylash, Senat kengashining qarorlarini tasdiqlash masalalarini ko‘rib chiqadi.