AEXA Zaporijjya AESni zudlik bilan Ukraina nazoratiga qaytarish bo‘yicha rezolyutsiyani ma’qulladi

Atom energiyasi bo‘yicha xalqaro agentlik (AEXA) bosh konferensiyasi Zaporijjya atom elektr stansiyasini zudlik bilan Ukrainaning to‘liq nazoratiga qaytarish to‘g‘risidagi rezolyutsiyani ma’qulladi. Bu haqda Ukraina Energetika vazirligi matbuot xizmati xabar berdi.

Rezolyutsiya Kanada, Finlandiya va Kosta-Rika tomonidan taklif qilingan. Ukrainadagi yadro xavfsizligi haqidagi hujjat 69 davlat tomonidan qo‘llab-quvvatlandi. 

«Boshqa narsalar qatorida, u (rezolyutsiya) Rossiyani Zaporijjya AESdan barcha harbiy va boshqa xodimlarni zudlik bilan olib chiqib ketishga va stansiyani Ukrainaning amaldagi litsenziyasiga muvofiq Ukraina vakolatli organlari nazoratiga qaytarishga chaqiradi», deyiladi bayonotda. 

Ukraina energetika vaziri German Galushchenko AEXA bosh direktori Rafael Grossiga egallab olingan Zaporijjya AES atrofidagi vaziyatni tartibga solish borasidagi sa’y-harakatlari uchun minnatdorchilik bildirdi. 

«Ukrainaning AEXA boshqaruvchilar kengashiga qabul qilinishi, shuningdek, bizning Zaporijjya AESni Ukraina nazoratiga qaytarishga chaqiruvchi rezolyutsiyaning qabul qilinishi sivilizatsiyalashgan dunyo biz bilan ekanligidan dalolatdir», dedi u.