Davlat organlarida «yashil» iqtisodiyotni joriy etish uchun mas’ullar belgilanadi

Vazirlar Mahkamasining “Yashil” iqtisodiyotga o‘tish jarayonini boshqarish tizimini tashkil etish chora-tadbirlari to‘g‘risida”gi qarori qabul qilindi.

2030 yilgacha O‘zbekiston Respublikasida “yashil” iqtisodiyotga o‘tish va “yashil” o‘sishni ta’minlash dasturida quyidagilar nazarda tutilgan:

davlat boshqaruvi organlari va xo‘jalik birlashmalarining amaldagi rahbar o‘rinbosarlaridan biriga “yashil” iqtisodiyot masalalarini muvofiqlashtirish vazifasini yuklash;

davlat boshqaruvi organlari va xo‘jalik birlashmalarida “yashil” iqtisodiyot masalalari bilan shug‘ullanishga mas’ul bo‘linmalarni belgilash.

Mas’ul rahbarlar va bo‘linmalar quyidagilarni amalga oshirishi lozim:

respublika ijro etuvchi hokimiyat organi yoki xo‘jalik birlashmasi faoliyatiga oid “yashil” iqtisodiyot masalalarini muvofiqlashtirish;

tabiiy resurslardan barqaror va samarali foydalanish tamoyillariga rioya etish;

iqtisodiyot sohasining tabiiy ofatlar va iqlim o‘zgarishiga nisbatan barqarorligini ta’minlash;

qayta tiklanuvchi energiya manbalari va energiya samarador texnologiyalarni joriy qilishga qaratilgan choralarni ko‘rish;

“yashil” innovatsiyalarni joriy etish va investitsiyalarni jalb qilish.
 
Respublika ijro etuvchi hokimiyat organlari hamda ustav fondida davlat ulushi 50 foiz va undan ortiq bo‘lgan xo‘jalik birlashmalariga bir oy muddatda “yashil” iqtisodiyot faoliyati sohasida uch yilga mo‘ljallangan “yo‘l xaritasi”ni tasdiqlash topshirildi.

Iqtisodiyot va moliya vazirligiga Jahon banki bilan hamkorlikda ishlab chiqilayotgan Milliy iqlim va rivojlanish hisoboti (Country Climate and Development Report – CCDR) asosida tegishli vazirliklar va idoralarga ko‘rsatma va tavsiyalar yuborish topshirildi.