Qashqadaryoda 4 tonna iste’molga yaroqsiz go‘sht to‘xtatib qolindi

Iste’molga yaroqsiz go‘shtlarni ikki nafar shaxs ISUZU yuk mashinasida Samarqandga olib ketayotganida to‘xtatib qolingan.

Foto: Bosh prokuratura huzuridagi Departament

Bosh prokuratura huzuridagi departamentning Ko‘kdala tuman bo‘limi tomonidan IIB va veterinariya va chorvachilikni rivojlantirish bo‘limi xodimlari bilan hamkorlikda tezkor tadbir o‘tkazilgan.

Tadbirda “Qarshi-Samarqand” yo‘nalishida harakatlanayotgan “ISUZU” yuk mashinasi to‘xtatilib ko‘zdan kechirilganda, fuqarolar O.X. va J.V. jami 4 tonna iste’molga yaroqsiz qoramol go‘shtini o‘tkazish maqsadida olib ketayotgani aniqlangan. Mahsulot ashyoviy dalil sifatida olingan.

Qayd etilishicha, mazkur holat yuzasidan Jinoyat kodeksining 186-moddasi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish) bilan jinoyat ishi qo‘zg‘atilib, tergov harakatlari o‘tkazilmoqda.