Britaniya ikkita kemasini Sharqiy O‘rta Yer dengiziga yuboradi

Britaniya Isroilni qo‘llab-quvvatlab, Sharqiy O‘rta Yer dengiziga ikkita qirollik dengiz floti kemasi hamda dengiz patruli va kuzatuv samolyotlarini joylashtirishini e’lon qildi.

Bosh vazir idorasi bayonotida aytilishicha, Rishi Sunak «Isroilni qo‘llab-quvvatlash va mintaqaviy barqarorlikni mustahkamlash hamda taranglikning kuchayishiga yo‘l qo‘ymaslik» uchun Sharqiy O‘rta Yer dengiziga Britaniya harbiylarini joylashtirishga buyruq bergan.

Xabarda qayd etilishicha, Qirollik dengiz flotining RFA Argus va RFA Lyme Bay kemalari Sharqiy O‘rta Yer dengiziga jo‘natiladi, mintaqa barqarorligiga tahdidlarni kuzatish uchun 13 oktyabrdan boshlab dengiz patruli va kuzatuv samolyotlari mintaqada parvoz qila boshlaydi.

Shuningdek, qirollik dengiz flotining ishchi guruhi keyingi hafta humanitar yordam sa’y-harakatlarini qo‘llab-quvvatlash uchun favqulodda chora sifatida Sharqiy O‘rta Yer dengiziga joylashtirilishi qayd etilgan.