Erdo‘g‘an: G‘azodagi qirg‘inni hech narsa bilan oqlab bo‘lmaydi

Turkiya prezidenti Rajab Toyyib Erdo‘g‘an, Beshtepa Milliy kongress va madaniyat markazida bo‘lib o‘tgan Turkiya Yoshlar jamg‘armasining (TÜGVA) tashkiliy yig‘ilishida ishtirok etdi.

Prezident nutq so‘zlab, Isroil-Falastin mojarosiga alohida e’tibor qaratdi.

«Biz asrlar davomida adolatdan voz kechmagan xalqmiz. Isroil-Falastin ziddiyatiga munosabatimiz adolat va halollikka asoslangan», - dedi Erdo‘g‘an.

U AQShning bu boradagi pozitsiyasini tanqid qilib, dunyoning barcha davlatlarini tinchlikka erishish uchun harakat qilishga chaqirdi.

«Amerika kabi davlat uchun nima ko‘proq mos keladi? U tinchlik o‘rnatishga intilyaptimi yoki olovni yanada kuchaytiryaptimi?» - dedi prezident.

Erdo‘g‘an butun dunyo e’tiborini qamaldagi G‘azo sektorida og‘ir humanitar vaziyatga qaratdi:

«G‘azoda suv ham, non ham, oziq-ovqat ham yo‘q. Bu Inson huquqlari umumjahon deklaratsiyasiga ziddir. G‘arb qayerga qarayapti? Ular hozirgacha qanday choralar ko‘rdi? Hech qanday!»

Har qanday urush ma’lum qonun-qoidalarga ko‘ra olib borilishi kerakligini ta’kidlagan prezident Erdo‘g‘an G‘azoning bombardimon qilinishini qirg‘inga qiyosladi.

«G‘azodagi qirg‘inni hech narsa bilan oqlab bo‘lmaydi», dedi u.

«G‘azoning 2 million aholisiga elektr, suv, yonilg‘i va oziq-ovqat ta’minotini uzib qo‘yish g‘ayriinsoniylikdir va urush qoidalarida bunday narsa yo‘q», - dedi Erdo‘g‘an.

Unga ko‘ra, davlatlar qonunlarga rioya qilishi va buning uchun javobgarlikni zimmasiga olishi shart: «Guruhlardan farqli o‘laroq, davlatlar urush qonunlari va inson huquqlarini hurmat qilishga majbur. Bu chegara asta-sekin yo‘qolib borayotganini ko‘ryapmiz».

Prezident ta’kidlashicha, hozir eng muhim vazifa keskinlikni pasaytirish, tinchlik o‘rnatishdir.

«Biz mojarolar mintaqamizga tarqalishini istamaymiz. Mintaqada ovozi va ta’siri bo‘lganlarni keskinlikni pasaytirishga, kimnidir ko‘r-ko‘rona qo‘llab-quvvatlamaslikka chaqiramiz», - dedi Erdo‘g‘an.