Turkiy davlatlar tashkilotida inson resurslarini rivojlantirish bo‘yicha barqaror hamkorlik yo‘lga qo‘yiladi

Yig‘ilishga TDTga a’zo davlatlar — O‘zbekiston, Ozarboyjon, Turkiya, Qozog‘iston, Qirg‘izistonning inson resurslarini rivojlantirishga mas’ul idoralar rahbarlari, 30 nafarga yaqin vakillari, O‘zbekistondagi vazirlik, idoralar, hokimliklarning kadrlar bilan ishlash bo‘linmalar rahbarlari, xorijiy va mahalliy OAV vakillari ishtirok etdi.

Qayd etib o‘tish kerak 2022 yilning iyul oyida Turkiya prezidenti huzuridagi Inson resurslari ofisi tomonidan Istanbul shahrida Turkiy davlatlar tashkilotiga a’zo va kuzatuvchi davlatlarning inson resurslarini rivojlantirishga mas’ul idora va tashkilotlari rahbarlarining ilk yig‘ilishi o‘tkazilgan edi.

Dastlabki yig‘ilish yakunlari bo‘yicha Turkiy davlatlar tashkiloti doirasida o‘zaro hamkorlikni yanada kengaytirish, bu kabi uchrashuvlarni har yili a’zo mamlakatlarning birida o‘tkazishga kelishib olingan, ikkinchi yig‘ilishini O‘zbekistonda tashkil qilish taklif qilingan edi.

Ushbu tadbir davlat xizmatini rivojlantirishda salohiyatli kadrlar zaxirasini shakllantirish muammolari, iste’dodli shaxslarni davlat xizmatiga jalb qilishning zamonaviy va samarali mexanizmlarini muhokama qilish va o‘zaro hamkorlik uchun qulay maydon yaratish maqsadida tashkil etildi.

O‘zbekistonda amalga oshirilayotgan islohotlar davlat fuqarolik xizmati tizimini ilg‘or xorij tajribasi asosida isloh qilish zaruratini ko‘rsatmoqda. Shu o‘rinda, 2022 yil 8 avgustda qabul qilingan «Davlat fuqarolik xizmati to‘g‘risida»gi qonunni hayotga samarali tatbiq etish uchun xorij tajribasida o‘zini oqlagan zamonaviy mexanizm va texnologiyalarni qo‘llash kun sayin dolzarb masalaga aylanib bormoqda.

«O‘zbekistonda prezident Sh.Mirziyoyev tomonidan lgari surilgan tashabbusga ko‘ra mahallalarda ishni tashkil qilish tajribasi bizda juda katta qiziqish uyg‘otdi. Mahallarda yettilik joriy etilishi tajribasini o‘zbekistonlik kadrlar xizmati sohasida mehnat qilayotgan hamkasblarimizdan o‘rganmoqdamiz. Biz Qirg‘izistonda joriy etgan o‘z tajribamiz bilan ham o‘rtoqlashdik. Bu avtomatlashtirilgan axborot tizimi bo‘lib, «Tunduk» tizimiga ulanadi va kadrlar bo‘yicha barcha informatsiyalar bitta joyga to‘planadi. Biz o‘zimizning ehtimolli xodimlarimizning ish sifati va salohiyatiga bir onda baho bera olamiz. Turkiy tilli davlatlar o‘rtasida tajriba almashinuvi barchamiz uchun foydali bo‘lishi shubhasiz», — dedi jurnalistlar bilan suhbatda Qirg‘izistondan kelgan arbob Xudaybergan Bazarbayev.

Darhaqiqat, olib borilayotgan islohotlarning natijadorligi birinchi navbatda davlat fuqarolik xizmatidagi rahbar kadrlarning sifat tarkibiga to‘g‘ridan-to‘g‘ri bog‘liq bo‘ladi. Zamonaviy sharoitda rahbar kadrlar tarkibining barqarorligini ta’minlash va sifatini yaxshilash maqsadida salohiyatli hamda istiqbolli kadrlar zaxirasini shakllantirish, iste’dodli shaxslar, ayniqsa, yoshlarni davlat fuqarolik xizmatiga jalb qilish bo‘yicha yangi trendlar va yondashuvlarni inobatga olish muhim ahamiyat kasb etadi.

Yig‘ilishni O‘zbekiston Respublikasi Prezidenti huzuridagi Davlat xizmatini rivojlantirish agentligi direktorining birinchi o‘rinbosari —  Otabek Hasanov, Turkiy davlatlar tashkiloti Bosh kotibining o‘rinbosari Sadi Jafarov ochib berdi.

Shundan so‘ng, Turkiy davlatlar tashkilotiga a’zo davlatlarning inson resurslarini boshqarish va rivojlantirish bo‘yicha rahbarlari o‘z tajribalari yuzasidan taqdimot qilishdi. «Zamonaviy davlat boshqaruvi sharoitida rahbar kadrlarning salohiyatini oshirishning dolzarb masalalari» mavzusida davra suhbati tashkil etildi. Davlat xizmati sohasida olib borilayotgan xalqaro va mintaqaviy tadqiqotlarning natijalari tahlil qilindi. Shuningdek, uchrashuv davomida ikki tomonlama muzokalar ham tashkil etildi. O‘zbekiston Respublikasi Prezidenti huzuridagi Davlat xizmatini rivojlantirish agentligi Ozarboyjon Respublikasi Davlat imtihon markazi hamda Davlat xizmati sohasidagi Ostona mintaqaviy xabi bilan o‘zaro hamkorlik to‘g‘risida Memorandum imzoladi.

Davlat xizmati bo‘yicha Ostona habi Qozog‘iston Respublikasi Davlat xizmati ishlari bo‘yicha agentligi va BMT Taraqqiyot Dasturining Qozog‘istondagi vakolatxonasi tashabbusi bilan 2013 yil 15 martda tashkil topgan. Davlat xizmati bo‘yicha Ostona xabi hamkor davlatlarda davlat xizmati samaradorligini oshirish va ularni samarali isloh qilish yuzasidan fikr almashish uchun maydon sifatida xizmat qiladi.

Qolaversa, O‘zbekiston Respublikasi prezidenti huzuridagi Davlat xizmatini rivojlantirish agentligi rahbariyati Qirg‘iziston Respublikasi Vazirlar Mahkamasi huzuridagi Davlat xizmati va mahalliy hokimiyat ishlari bo‘yicha agentligi direktori Kudaybergen Bazarbayev, Turkiya Respublikasi Prezident huzuridagi Inson resurslari ofisi rahbari Salim Atay, Qozog‘iston Respublikasi Davlat xizmati ishlari bo‘yicha agentligi raisining o‘rinbosari Azamat Jolmanov bilan muzokaralar olib bordi.

Yig‘ilish davomida kadrlar siyosati va davlat xizmatidagi zamonaviy trendlar, yangi g‘oyalar va yondashuvlar muhokama qilindi. Rahbar kadrlar zaxirasini shakllantirish va u bilan samarali ishlash bo‘yicha ilg‘or tajribalar taqdimoti tashkil etildi. Shuningdek, iste’dodli shaxslar, xususan, yoshlarni davlat xizmatiga keng jalb qilish bo‘yicha o‘zaro tajriba almashildi.

Turkiy davlatlar tashkilotiga a’zo mamlakatlarning inson resurslarini rivojlantirishga mas’ul idoralari o‘rtasida barqaror hamkorlik yo‘lga qo‘yilishi ham e’lon qilindi.