Abdulla Azizov Farmatsevtika agentligi direktori etib tayinlandi

Farmatsevtika tarmog‘ini rivojlantirish agentligiga yangi direktor tayinlandi. Abdulla Azizov ushbu lavozimda ish boshladi.

Abdulla Azizov 1981 yilda Toshkent viloyatida tug‘ilgan. Ma’lumoti – oliy, 2004 yilda Jahon iqtisodiyoti va diplomatiya universitetining Xalqaro iqtisodiy munosabatlar fakultetini tamomlagan, Daniyaning Orxus universitetida moliya va xalqaro biznes yo‘nalishi bo‘yicha magistr darajasini olgan. Orxus texnika kollejini IT-dasturchi mutaxassisligi bo‘yicha tamomlagan.

U 2006-2019 yillarda Daniya kompaniyalarida moliya va biznes-loyihalarni avtomatlashtirish sohasida mas’ul lavozimlarda ishlagan. 2019-2020 yillarda Davlat soliq qo‘mitasi raisi o‘rinbosari bo‘lgan. 2020-2022 yillarda - sog‘liqni saqlash vaziri o‘rinbosari.

Abdulla Azizov 2022 yildan hozirgi vaqtga qadar «Olmaliq KMK» AJ boshqaruvi raisining raqamlashtirish bo‘yicha o‘rinbosari sifatida ishlab kelayotgandi.

Sentyabr oyi boshida imzolangan prezident farmoni bilan Farmatsevtika tarmog‘ini rivojlantirish agentligi Sog‘liqni saqlash vazirligi tuzilmasiga o‘tkazilgandi.

Ma’lumot uchun, prezident Farmatsevtika agentligi rahbari Sardor Kariyevni 2022 yilning 30 dekabr kuni lavozimidan ozod qilgan edi.