15:34 / 28.10.2023
10370

Xorazmda “4 kunlik” firma tenderda 1 mlrd so‘mlik loyihalarni qo‘lga kiritdi

16 oktyabr kuni davlat ro‘yxatidan o‘tkazilgan “Pitnak Sunrise” MChJ 20 oktyabr kuni Tuproqqal’a tuman ixtisoslashtirilgan maktabi tomonidan tenderga qo‘yilgan 5 ta lotning barchasini yutdi. Ushbu shubhali tender ortidan maktab direktoriga intizomiy chora qo‘llanilgan, tanlov natijalari esa bekor qilingan.

Tuproqqal’a tuman ixtisoslashtirilgan maktabi tomonidan 20 oktyabr kuni quyosh paneli o‘rnatish, interaktiv doska, printer, mebel jihozlari xarid qilish uchun tanlovlar o‘tkazilgan. Tenderga qo‘yilgan, jami summasi 1 mlrd so‘mdan ortiq 5 ta lotning barchasini “Pitnak Sunrise” MChJ qo‘lga kiritgan.

Maktab tomonidan tenderga chiqarilgan eng yuqori summali lot quyosh panellari o‘rnatish bilan bog‘liq. Boshlang‘ich summasi 700 mln so‘m bo‘lgan lotni “Pitnak Sunrise” MChJ yutgan va u bilan 680 mln so‘mga shartnoma tuzilishi ko‘zda tutilgan. 

200 mln so‘mlik mebel jihozlari yetkazib berish lotini ham “Pitnak Sunrise” MChJ qo‘lga kiritgan. Shartnomasi summasi 185 mln 650 ming so‘m.  

Shuningdek, “Pitnak Sunrise” MChJ maktab tomonidan 172,4 mln so‘m boshlang‘ich narx bilan tanlovga qo‘yilgan interaktiv doska, konditsioner va printer yetkazib berish lotini 170 mln so‘m narx taklifi bilan yutgan.

“Pitnak Sunrise” MChJ ushbu tenderlar o‘tkazilishidan 4 kun avval, 16 oktyabr kuni davlat ro‘yxatidan o‘tkazilgan. Ustav fondi 850 mln so‘m bo‘lgan firmaga 100 foizlik ulush bilan Shavkat Boltayev egalik qiladi.

MChJning faoliyat turi yoritish uskunalari va boshqa maishiy jihozlar chakana savdosi.

Kun.uz holat yuzasidan izoh olish maqsadida Prezident va ixtisoslashtirilgan ta’lim muassasalari agentligi matbuot kotibi Jo‘rabek Jangirov bilan bog‘landi.

Agentlik matbot kotibining ma’lum qilishicha, Tuproqqal’a tuman ixtisoslashtirilgan maktabining “Pitnak Sunrise” MChJ bilan bog‘liq yuqoridagi tender natijalari bekor qilingan. Shuningdek, ushbu shubhali tender uchun ixtisoslashtirilgan maktab direktoriga intizomiy chora ko‘rilgan.

Jo‘rabek Jangirovning qo‘shimcha qilishicha, maktab tomonidan tenderga chiqarilgan mazkur lotlar “Tashabbusli budjet”da g‘olib bo‘lgan loyiha hisoblanadi. Unga mablag‘ budjetdan ajratilishi ko‘zda tutilgan.  

Mavzuga oid
Top