Ochilboy Ramatovning parlament so‘roviga yuborgan javobi deputatlarni qoniqtirmadi

Bosh vazir o‘rinbosari Ochilboy Ramatovning «Yo‘l harakati xavfsizligini ta’minlash sohasiga zamonaviy axborot texnologiyalarini joriy etishda amalga oshirilayotgan ishlar holati to‘g‘risida» parlament so‘roviga yuborgan javobi Qonunchilik palatasi deputatlarini qoniqtirmadi.

19 sentabrda yuborilgan Parlament so‘roviga bosh vazir o‘rinbosari tomonidan 26 oktyabrda javob berilgan. Belgilangan tartibda ushbu javob barcha siyosiy partiyalarning fraksiya yig‘ilishlarida muhokamadan o‘tkazilgan.

Mudofaa va xavfsizlik masalalari qo‘mitasi raisi Erkin Solihovning qayd etishicha, respublikada yo‘l harakati xavfsizligini ta’minlashda qator ijobiy ishlar amalga oshirilgan va taqdim etilgan ma’lumotlarda bu o‘z aksini topgan.

“Lekin shu bilan birga Qonunchilik palatasi tomonidan qabul qilingan qarorda ko‘zda tutilgan savolga yetarlicha ma’lumotlar taqdim etilmagani, javoblar to‘liq bo‘lmagani uchun fraksiyalar, deputatlar tomonidan ushbu masalani yana qayta ko‘rib chiqish taklifi bildirilgan. Ya’ni bosh vazir o‘rinbosariga ushbu masala bo‘yicha qo‘yilgan savollarga to‘liq javob berish[ni so‘rash — tahr.] to‘g‘risida qaror qabul qilish taklifi berildi.

Ushbu taklifdan kelib chiqib, qo‘mitamiz tegishli qaror loyihasini tayyorladi. Qarorda taqdim qilingan ma’lumot axborot uchun qabul qilinyapti va shu bilan birga qo‘yilgan savollarga yetarli tushuntirish berilmagani ham qayd etildi”, – dedi deputat.

Fraksiya qarorida shundan kelib chiqib, 1 dekabrgacha bosh vazir o‘rinbosarining qo‘shimcha javob berishi to‘g‘risidagi band kiritilgan.