YeK 2023 va 2024 yillar uchun yevrohududda YaIM o‘sishi prognozini pasaytirdi
Yevrohududning 20 ta davlati iqtisodiyoti, Yevropa komissiyasining yangi prognoziga ko‘ra, bu yil ilgari kutilgandek 0,8 foizga emas, 0,6 foizga o‘sadi. Kelgusi yilda o‘sish ilgari kutilgan 1,3 foiz o‘rniga 1,2 foizni tashkil qiladi.
![](https://storage.kun.uz/source/10/_qo-Nl1cdeYRSYM6ucgBoUH3fiBNUHJW.jpg)
Foto: eurasianeconomic.org
Yevropa komissiyasi (YeK) 2023 va 2024 yillarda yevrohudud iqtisodiyoti o‘sish bahosini yuqori turmush narxi, zaif tashqi talab va pul-kredit siyosatining keskinlashuvi sharoitida pasaytirdi. Yevropa Ittifoqining 15 noyabr, chorshanba kuni e’lon qilingan kuzgi prognozida ta’kidlanganidek, yevrohududning 20 ta davlati yalpi ichki mahsuloti bu yil yozda kutilganidek 0,8 foizga emas, 0,6 foizga o‘sadi. 2024 yilda yevrohudud yalpi ichki mahsulotining o‘sishi, yangi hisob-kitoblarga ko‘ra, ilgari kutilgan 1,3 foiz o‘rniga 1,2 foizni tashkil etadi.
Joriy yil uchun Yevropa Ittifoqining 27 mamlakati uchun iqtisodiy o‘sish prognozi ham yomonlashdi - 0,8 foizdan 0,6 foizga, keyingi yil uchun - 1,4 foizdan 1,3 foizga.
2025 yilda Yevrokomissiya yevrohudud iqtisodiyoti 1,6 foizga, Yevropa Ittifoqi 1,7 foizga o‘sishini kutmoqda.
Germaniya iqtisodiyoti 2024 yilda o‘sishni tiklaydi
YeK prognoziga ko‘ra, Germaniya iqtisodiyoti 2023 yilda 0,3 foizga qisqaradi va kelgusi yilda 0,8 foizga o‘sadi. Ilgari birinchi ko‘rsatkich 0,4 foizga pasayishi, ikkinchisi esa 1,1 foizga oshishi kutilgan edi. 2025 yilda Germaniya yalpi ichki mahsuloti 1,2 foizga o‘sishi prognoz qilinmoqda.
«Bu yil Rossiyaning Ukrainadagi urushi, zaif global talab va yuqori iste’mol narxlari ta’siridan jabr ko‘rgan Yevropa Ittifoqi iqtisodiyoti uchun og‘ir yil bo‘ldi, - dedi YeK rahbarining birinchi o‘rinbosari Valdis Dombrovskis. - Bu yil juda zaif o‘sishdan so‘ng, 2024 yilda mo‘’tadil tiklanishni kutish mumkin, bunga kuchli mehnat bozori va inflatsiyaning doimiy pasayishi turtki beradi. Biroq, biz Yaqin Sharqdagi mojaro bilan yanada kuchaygan juda noaniq geosiyosiy landshaftga duch kelishda davom etamiz».
Yevrokomissiya ma’lumotlariga ko‘ra, inflatsiya «pasayish tendensiyasini ko‘rsatishda davom etmoqda». Joriy yil uchun yevrohududda inflatsiya prognozi 5,6 foiz darajasida qoldirildi va keyingi yil uchun u 2,9 foizdan 3,2 foizgacha ko‘tarildi. 2025 yilda inflatsiya 2,2 foizga tushishi kutilmoqda. Yevropa Ittifoqida, YeK prognoziga ko‘ra, 2023 yilda inflatsiya 6,5 foiz, 2024 yilda - 3,5 foiz, 2025 yilda - 2,4 foiz bo‘ladi.
Mavzuga oid
![](https://storage.kun.uz/source/thumbnails/_medium/10/vAbyipL60tOt4zNLGbn5G3k2TrAGs-FC_medium.jpg)
10:21 / 11.08.2024
O‘zbekiston YaIM hajmi shakllanishida eng yuqori ulush qaysi hududga tegishli ekani ma’lum qilindi
![](https://storage.kun.uz/source/thumbnails/_medium/10/46Rh-zODD2XsNUep9LBuD1j9vOs2PUlA_medium.jpg)
20:03 / 31.07.2024
O‘zbekiston iqtisodiyoti hajmi 100 mlrd dollardan oshgan - tadqiqot
![](https://storage.kun.uz/source/thumbnails/_medium/10/QjsgeVNjCRsmrl0mdpyYVul69-7ip5Vc_medium.jpg)
09:05 / 18.07.2024
Re:Russia loyihasi: yil davomida YaIM 1,5 foizi harbiylarga to‘lov uchun sarflangan
![](https://storage.kun.uz/source/thumbnails/_medium/10/PqTAETG2-ITe7ZFaQLHCsj4o-kzc2c1w_medium.jpg)
13:28 / 16.04.2024