Yavlinskiy Putin bilan Ukrainadagi urushni muhokama qilgani haqida gapirdi

«Yabloko» liberal partiyasi asoschisi Grigoriy Yavlinskiy oktyabr oyida Rossiya prezidenti Vladimir Putin bilan uchrashuvda Ukraina va Rossiya o‘rtasidagi ehtimoliy muzokaralarda vositachi sifatida o‘z nomzodini ilgari surgan. Yavlinskiy bu haqda 5 dekabr, seshanba kuni chop etilgan RBK agentligiga bergan intervyusida gapirdi.

Yavlinskiy vositachilik tajribasiga ega ekanligini eslatdi. «Men faqat Rossiya vakili bo‘lishim mumkin, boshqa hech kimdan vakil bo‘la olmayman. Lekin ha, men o‘z nomzodimni taklif qildim. Chechenistonda, keyin Dubrovkada vositachi bo‘lganman. Men tayyorman. Bu og‘riqli narsa, lekin agar kerak bo‘lsa sulh sari qadam tashlashga tayyorman», dedi Yavlinskiy. 

Siyosatchining so‘zlariga ko‘ra, uning uchun «Rossiya va Ukraina xuddi o‘ng va chap qo‘llari kabidir». U o‘zi Lvivda tug‘ilganini, ukasi hali ham u yerda yashayotganini eslab o‘tdi. 

«Men dalillarimni keltirdim, prezident ularga javob bermadi» 

Yavlinskiyning aytishicha, Putin bilan uchrashuvda Ukrainada o‘t ochishni tezroq to‘xtatish haqida bahslashgan. «Men o‘z dalillarimni keltirdim, lekin prezident ularga javob bermadi. Savol ochiq qoldi. Prezident juda jiddiy, aniqlik kirituvchi savollar berdi. Bu chuqur va uzoq suhbat bo‘ldi», - dedi siyosatchi. 

Yavlinskiyning so‘zlariga ko‘ra, asosiysi - o‘t ochishni to‘xtatish, keyin esa uzoq muzokaralar bo‘ladi, ular «to‘xtaydi, yana boshlanadi, ko‘plab texnik muammolar paydo bo‘ladi: qo‘shinlarning ajratilishi, demarkatsiya chizig‘i, buni kim kuzatib borishi, u yerda xalqaro kuchlar bo‘lishi». 

Shu bilan birga, Yavlinskiyning ta’kidlashicha, uch oy oldin «hatto sulh so‘zi ishlatilmagan», ammo hozir, uning so‘zlariga ko‘ra, «Ukrainaning qarshi hujumi to‘xtab qoldi, Yaqin Sharq muammosi paydo bo‘ldi, Kiyevda siyosiy nizolar boshlandi». «Demak, sulh tez orada asosiy iboraga aylanadi. Bu hali meynstrim emas, lekin vaqti-vaqti bilan paydo bo‘la boshladi. Bu baribir bo‘ladi. Lekin qarorni kechiktirish har kuni odamlar hayotiga ta’sir ko‘rsatyapti», - deydi Yavlinskiy. 

«Mojaroda hamma aybdor» 

Grigoriy Yavlinskiyning so‘zlariga ko‘ra, Ukrainadagi urushda «hamma aybdor». «Hozirgacha hech kim sulh haqida jiddiy gapirishni istamadi, ammo birovning orqasida turib: «Men senga har qanday qurolni beraman, sen faqat jang qil, men o‘zim jang qilmayman, odamlaringni o‘sha yerda o‘ldirishsin», dedi — bu siyosatmi?» - deydi Yavlinskiy. 

Yavlinskiyga ko‘ra, bo‘lajak muzokaralarda «2050 yilgacha bo‘lgan uzoq istiqbolni» ko‘rish zarur. «Hozir dunyo shunday tuzilganki, NATO 30-40 yildan keyin qanday bo‘lishini hech kim bilmaydi», deb tushuntirdi u.