O‘zbekistonda kassa operatsiyalari yashirin iqtisodiy faoliyatni amalga oshirishning asosiy usuli bo‘lib qolayotgani aytildi

"Dunyo" xabariga ko‘ra, unda senator so‘nggi yillarda mamlakatda soliq ma’muriyatchiligini takomillashtirish, uning tizimini soddalashtirish orqali iqtisodiyot tarmoqlarini rivojlantirish, shuningdek, yashirin iqtisodiyotni kamaytirish bo‘yicha me’yoriy-huquqiy bazani mustahkamlash, jamoatchilik nazoratini kuchaytirish, davlat hokimiyati va boshqaruvi organlari faoliyatini takomillashtirishga qaratilgan islohotlar bosqichma-bosqich amalga oshirilayotganini alohida ta’kidlaydi.

Shu bilan birga, u kassa operatsiyalari yashirin iqtisodiy faoliyatni amalga oshirishning asosiy usuli bo‘lib qolayotganiga urg‘u beradi. "Shuning uchun bank kartalari va boshqa to‘lov vositalaridan foydalanish jozibadorligini oshirish orqali naqd pulsiz hisob-kitoblar ko‘lamini kengaytirish choralarini ko‘rish zarur, - deyiladi maqolada. – O‘zbekiston ayni paytda yashirin iqtisodiyoti yuqori bo‘lgan davlatlardan biri sanaladi. Shu bois mamlakatda iqtisodiyot sektorini qonuniylashtirish bo‘yicha qator chora-tadbirlar belgilandi. Ma’lumki, yashirin iqtisodiyot darajasining pasayishi budjet daromadlari hajmining ijobiy o‘zgarishiga xizmat qiladi".

Yashirin iqtisodiyotga qarshi kurashish, daromadlarga soliq solish borasida rivojlangan mamlakatlarning ilg‘or tajribasini qo‘llash maqsadga muvofiq, degan xulosaga keladi Erkin Gadoyev. "Buning uchun yashirin iqtisodiy faoliyatga qarshi kurashish va uning oldini olishda jamoatchilik nazorati mexanizmlari imkoniyatlaridan samarali foydalanish zarur", - deya yakunlaydi senator.