FNQIZ benzin ishlab chiqarishni ikki barobarga oshirmoqda

“Avtomobil dvigatellari yuqori sifatli va sovuqqa chidamli yonilg‘i talab qiladigan palla – qish mavsumida yonilg‘iga tobora ortib borayotgan talabga javoban ana shunday strategik qaror qabul qilindi. Benzin ishlab chiqarish hajmining oshirilishi yonilg‘i bozorida barqaror taklifni ta’minlab, zavodga qish mavsumida iste’molchilar talabini samarali qondirish imkonini beradi”, – deyiladi vazirlik axborotida.

Saneg kompaniyasi bosh direktorining neftni qayta ishlash bo‘yicha o‘rinbosari Habib Latipovga ko‘ra, benzin ishlab chiqarish hajmining oshirilishi – zavodda amalga oshirilayotgan modernizatsiya doirasidagi yangi texnologik yechimlar samarasi bo‘lib, aholini arzon yoqilg‘i bilan ta’minlashga qaratilgan.

“Bugungi kunda zavod texnologik jarayonlarning yangi bosqichiga chiqmoqda, uskunalarning optimal ish parametrlarini belgilamoqda. Benzin ishlab chiqarish hajmining o‘sishi ham erkin bozor narxini shakllantirishga xizmat qiladi”, – degan Latipov.

Avvalroq, noyabr oyining boshida “O‘zbekneftgaz” va boshqa bir qator xususiy yonilg‘i quyish shoxobchalarida AI-95 markali benzin taqchilligi yuzaga kelgandi. 3 noyabr kuni Moskvada O‘zbekiston, Qozog‘iston va Rossiya energetika mas’ullari neft yetkazib berish masalasida shartnoma imzoladi.  Unga ko‘ra, O‘zbekiston Rossiyadan neft xomashyosi importini 2024 yildan boshlab yiliga 1 million tonnaga yetkazadi. Taqqoslash uchun, O‘zbekiston 2023 yilda Rossiya bilan bundan 3 barobar kam – 300 ming tonna neft xarid qilish bo‘yicha kelishuv tuzgandi.