«112» tezkor raqami o‘z muddatida ishga tushmadi

Prezident Shavkat Mirziyoyev 2023 yilning 28 iyul kuni Farg‘ona shahrida Ichki ishlar vazirligining kengaytirilgan hay’at yig‘ilishini o‘tkazib, tegishli vazirliklarga jinoyatchilikning oldini olishga qaratilgan qator topshiriqlar bergandi.

Jumladan, prezident tomonidan Ichki ishlar vazirligi (Po‘lat Bobojonov) va Raqamli texnologiyalar vazirligi (Sherzod Shermatov) oldiga aholining barcha tezkor va shoshilinch xizmatlarga murojaatlarini operativ hal qilish maqsadida yagona «112» tezkor raqami va dispetcherlik tizimini ishga tushirish vazifasi qo‘yilgan edi.

Hay’at yig‘ilishida ushbu tizim 2024 yil 1 yanvardan Toshkent shahrida, 1 iyulga qadar vodiy viloyatlarida, kelasi yil yakuniga qadar esa barcha tuman va shaharlarda ishga tushirilishi shartligi belgilangan.

Toshkent shahri (keyinchalik boshqa hududlar)dagi barcha qisqa raqamli tezkor navbatchilik - 101, 102, 103, 104, 1050, 1055 xizmatlari Yagona vaziyatlar markaziga jamlanadi hamda umumiy «112»-navbatchilik xizmati doirasida faoliyati tashkil etilishi ko‘zda tutilgandi.

Biroq yangi yilning 5 kuni o‘tdi hamki Toshkent shahrida «112» tezkor raqami hamda dispetcherlik tizimi ishga tushirilmadi.

Bugungi kun holatiga «112» qisqa raqami «mavjud bo‘lmagan raqam» sifatida turibdi.

Ichki ishlar va Raqamli texnologiyalar vazirliklari hozircha topshiriq ijrosi nega kechikayotgani, tizim qachon ishga tushirilishi bo‘yicha rasmiy izoh bermagan.