Oq uy rasmiylariga ko‘ra, AQSh prezidenti Jo Bayden bir haftadan ko‘proq vaqt oldin kasalxonaga yotqizilgan 70 yoshli Pentagon rahbari Lloyd Ostinning saraton tashxisi haqida 9 yanvar, seshanba kuni ertalab bilgan. «Bugun ertalabgacha Oq uyda hech kim vazir Ostinda saraton borligini bilmas edi», dedi seshanba kuni tushdan keyin Milliy xavfsizlik kengashining aloqa bo‘yicha direktori Jon Kirbi. Bu shuni anglatadiki, Bayden Ostin kasalligi haqida jamoatchilikdan bir necha soat oldin xabar topgan.
Oq uy vakili aytishicha, Bayden o‘z vazirining saratonga chalingani fakti yashirilgani haqidagi xabarga g‘azab bilan munosabatda bo‘lgan. «Bunday bo‘lmasligi kerak», deya AQSh prezidentining so‘zlarini keltirgan Jon Kirbi. Unga ko‘ra, Bayden hukumatda bunday holatlar bo‘yicha tartib qayta ko‘rib chiqilishini istayapti. Vazirliklarga tegishli xat allaqachon yuborilgan. «Bunday voqea boshqa takrorlanmasligiga ishonch hosil qilishimiz kerak, - dedi Kirbi. - Vazirlar mahkamasining har bir a’zosi bu lavozim imkon qadar shaffof bo‘lish mas’uliyatini yuklashini biladi».
Prezident Mudofaa vaziriga tezroq tuzalib ketishini tilaydi, dedi Kirbi. Bayden Ostin bilan 2025 yil boshida tugaydigan vakolat muddatining oxirigacha qolishni rejalashtiryaptimi, degan savolga, Kirbi: «Ha» deb javob berdi.
Pentagon Ostinning sog‘ayish istiqbollari haqida xabar berdi
Avvalroq Pentagon AQSh mudofaa vaziri Lloyd Ostin saraton tufayli kasalxonada davolanayotganini ma’lum qilib, vazirning kasalligi dastlabki bosqichda aniqlangani va uning tuzalib ketish istiqbollari «a’lo darajada» ekanini ma’lum qilgan edi. Ma’lum bo‘lishicha, Ostin yangi yildan beri kasalxonada.
Bundan tashqari, Vashington yaqinidagi Uolter Rid harbiy hospitalining vakolatxonasi xabarida aytilishicha, Pentagon rahbariga dekabr oyi boshida saraton tashxisi qo‘yilgan. Rojdestvo arafasida Ostin minimal invaziv jarrohlik amaliyotini o‘tkazdi. Vazir «operatsiyadan hech qanday muammosiz tiklanib, ertasi kuni ertalab uyiga qaytdi», deyiladi xabarda.
Ammo yangi yil kuni vazir kasallik asoratlari tufayli yana kasalxonaga yotqizildi. Dastlabki tekshiruvda peshob yo‘llari infeksiyasi aniqlangan va 2 yanvar kuni u jonlantirish bo‘limiga o‘tkazilgan. Shundan so‘ng, shifokorlarning ta’kidlashicha, Ostin tuzalib ketdi va uning «to‘liq tiklanishi» kutilmoqda, ammo bu jarayon uzoq davom etishi mumkin. «Vazir Ostin kasalxonada bo‘lgan paytida hushini yo‘qotmadi yoki umumiy behushlikda bo‘lmadi», deya ma’lumot bergan kasalxonada.
