Zelenskiy Davosda g‘arbni Rossiyaga qarshi birlashishga chaqirdi

Ukraina prezidenti Volodimir Zelenskiy g‘arbni Rossiya bilan urushda o‘z mamlakatini qo‘llab-quvvatlashda birdamlik ko‘rsatishga chaqirdi. Rossiyaga qarshi turish uchun Ukrainaga ko‘proq yordam kerak, dedi u 16 yanvar, seshanba kuni Davosdagi Jahon iqtisodiy forumida.

Ukraina rahbari so‘zlariga ko‘ra, g‘arbning Rossiya mojaroni yanada kuchaytirishi mumkinligidan xavotirlari tufayli Ukraina unga qarshi kurashda vaqt yo‘qotdi. U xalqaro hamkorlarni Moskvaga bosimni pasaytirmaslikka chaqirdi. «Unga bosimning har qanday qisqarishi urushni uzaytiradi», deb ta’kidladi Zelenskiy va shunday ishonch bildirdi: «Urush adolatli tinchlik bilan tugaydi».

Shu bilan birga, Zelenskiyning so‘zlariga ko‘ra, qasos olish emas, adolatga erishish muhim bo‘lgan Ukraina xalqi urushni boshlab bergan Rossiya rahbariyatini kechirmaydi. «Vaqt ularning foydasiga ishlamayapti. Bu dunyoda ular ham, ularning bolalari ham xavfsiz bo‘lmaydi, - deydi Ukraina rahbari. - Ular javobgarlikka tortiladi».

Zelenskiy Rossiya rahbariyatini ayblab chiqdi

Zelenskiy Rossiya rahbariyatini «ommaviy deportatsiyalar, vayron qilingan shahar va qishloqlar hamda urush hech qachon tugamasligi mumkinligi haqidagi dahshatli tuyg‘uni normallashtirishga urinishda» aybladi. Zelenskiyning so‘zlariga ko‘ra, ular Ukrainadagi muzlatilgan mojarodan qoniqmaydi. 2014 yildan keyin Donbassdagi urushni to‘xtatishga urinishlar bo‘lganini eslatib, u «Rossiya rahbariyati muzlatilgan narsadan qoniqmaydi», dedi. Volodimir Zelenskiy Kremldagilarning insoniy fazilatlarini inkor etib, ular «o‘zgarmasligini» ta’kidladi hamda «buni faqat odamlar qila olishi» mumkinligini tushuntirdi.

Ukraina prezidentining so‘zlariga ko‘ra, Moskvaga qarshi sanksiyalar zarur, chunki «ular pulni hamma narsadan ko‘ra yaxshi ko‘radi»: «Ular qancha ko‘p pul yo‘qotsa, bu oligarxlarga shunchalik qattiq ta’sir qiladi».

Zelenskiy Davosda Stoltenberg va yirik investorlar bilan uchrashdi

Davosdagi forum doirasida Zelenskiy NATO bosh kotibi Yyens Stoltenberg bilan muzokaralar o‘tkazdi, shuningdek, yirik investorlar ishtirokidagi uchrashuvda qatnashdi. Uning so‘zlariga ko‘ra, Stoltenberg bilan uchrashuvda «ko‘plab muhim masalalar» muhokama qilingan: «jang maydonidagi vaziyat, davlat mudofaa ehtiyojlari, Ukraina havo hujumidan mudofaa tizimini yanada mustahkamlash, NATOning Vashingtondagi navbatdagi sammitiga tayyorgarlik, Ukraina NATOga kirgunga qadar amalda bo‘ladigan G7 deklaratsiyasi doirasidagi ikki tomonlama xavfsizlik kelishuvlari bo‘yicha hamkorlar bilan ishlash».

«Yirik biznes yetakchilari – Ukraina» uchrashuvi chog‘ida, xususan, Ukrainaning iqtisodiy ko‘rsatkichlari muhokama qilindi. «U 2023 yilda 5 foizdan oshgan Ukraina iqtisodiy o‘sishi va 2024 yilga yalpi ichki mahsulot o‘sishi bo‘yicha optimistik prognozlar haqida gapirdi. Odamlarni Ukrainaga sarmoya kiritishga va uni qayta tiklashda ishtirok etishga taklif qildi. Bu yerda bo‘lish, mustahkamlash juda muhim. Ukrainaga sarmoya kiritib, iqtisodiyotimizni qo‘llab-quvvatlang», — deb yozdi Zelenskiy Telegram’da.