Peterburg portida bojxona bir tonnadan ortiq kokainni musodara qildi

Sankt-Peterburgning «Bolshoy» portida Belgiyadan yirik kokain kontrabandasi aniqlandi, deb xabar qildi Federal bojxona xizmati (Fs) matbuot xizmati 24 yanvar, chorshanba kuni. Gap 1200 kg narkotik haqida ketmoqda, uning qora bozordagi narxi 13 milliard rubldan oshadi, deyiladi departament bayonotida. 

Federal bojxona xizmati kontrabandani, jumladan bojxona nazoratining texnik vositalarini qo‘llash orqali aniqlaganini ta’kidlamoqda: «Bojxona xodimlari Antverpendan (Belgiya) kelgan konteynerni skanerdan o‘tkazdi va qahva qoplari orasida oq kukunli to‘rtburchak shakldagi briketlarni topdi. Ekspertiza uning kokain ekanini tasdiqladi». 

Kokain topilgach, Boltiqbo‘yi bojxonasi giyohvand moddalarni o‘ta yirik miqdorda kontrabanda qilish moddasi bo‘yicha jinoiy ish qo‘zg‘atdi. Jinoyat kodeksining ushbu moddasida umrbod ozodlikdan mahrum qilish jazosi nazarda tutilgan. 

Bir oy ichida kokainning ikkinchi partiyasi

Bu - shu oydagi ikkinchi ana shunday holat. 10 yanvar kuni Federal bojxona xizmati Sankt-Peterburgning «Bolshoy» portida og‘irligi bir tonnadan ortiq bo‘lgan mingta kokainli briket topilgani haqida xabar berdi. Ular Nikaraguadan kelgan konteyner ichidan topilgan. Partiyaning bir qismiga BBB, ikkinchisiga esa Dior belgisi qo‘yilgan. Federal bojxona xizmatining ma’lum qilishicha, musodara qilingan kokain partiyasining qora bozordagi qiymati 11 milliard rublga baholanmoqda.