Samarqandga Xitoydan 100 ta Yutong elektrobuslari olib kelinadi

Samarqand viloyatiga Xitoyning Yutong elektrobuslaridan 100 dona olib kelinadi. Prezidentning bu boradagi tegishli qarori qabul qilindi.

Hujjatga ko‘ra, Samarqand shahrida Yevropa tiklanish va taraqqiyot banki ishtirokida elektrobuslar xarid qilish va zarur infratuzilmani yaratish loyihasi amalga oshiriladi.

Uch yillik loyihaning umumiy qiymati 61,99 million dollarni tashkil etadi. YeTTB 18 yil muddatga, jumladan, uch yillik imtiyozli davrga 49 million dollar miqdorida kredit ajratadi.

Qolgan mablag‘ O‘zbekiston hukumati tomonidan qo‘shilgan qiymat solig‘ini qoplash va bojxona imtiyozlarini berish orqali moliyalashtiriladi.

Shuningdek, «Samarqandyo‘lovchitrans» Xitoyning Yutong Bus Co., Ltd kompaniyasi bilan 29,7 million dollarga 100 ta elektrobus va 50 ta quvvatlantirish stansiyasi sotib olish bo‘yicha shartnoma imzolagan.

Yangi elektrobuslar to‘g‘ridan to‘g‘ri tanlangan oddiy shahar avtobus yo‘nalishlariga yalpi shartnoma asosida yetti yil muddatga ajratiladi.

Qaror bilan Qoraqalpog‘iston Vazirlar Kengashi va viloyatlar hokimlariga Transport vazirligi va Investitsiyalar, sanoat va savdo vazirligi bilan birgalikda ikki oy muddatda elektrobuslar xarid qilish bo‘yicha loyihalar ishlab chiqish topshirilgan. Ulardan Nukus va viloyat markazlarida jamoat transportida foydalanish ko‘zda tutilgan.