Farg‘onada suv ta’minoti xodimiga pichoq bilan hujum qilgan shaxslar ushlandi

Suv ta’minoti xodimlari qarzni undirishga borganda hujumga uchragan.

Foto: IIB axborot xizmati

Hodisa Farg‘ona viloyatida “Farg‘ona suv ta’minoti” MChJ xodimiga tan jarohati yetkazmoqchi bo‘lgan fuqarolar ushlangan. IIB axborot xizmatining xabar berishicha hodisa Buvayda tumanida sodir bo‘lgan.

“Farg‘ona suv ta’minoti” MChJning Buvayda tuman bo‘limi xodimlari “Qoratepa” MFYda yashovchi T.K.ning yashash xonadoniga qarzdorlikni undirish uchun borgan.

Shunda T.K. va uning ukasi N.K. suv ta’minoti xodimlarini haqorat qilib, pichoq bilan hujum qilgan va tan jarohati yetkazmoqchi bo‘lgan.

Qayd etilishicha, mazkur holat yuzasidan ularga nisbatan MJtKning 183, 185 va 187-moddalariga asosan hujjatlar rasmiylashtirilgan. Hozirda tergovga qadar tekshiruv harakatlari olib borilmoqda.

Avvalroq, “Farg‘ona suv ta’minoti” MChJning Quvasoy shahar filiali nazoratchisi bo‘lgan ayolni haqorat qilgan shaxs 10 sutkaga qamalgandi.