Amerikalik harbiylarning Yaqin Sharqdagi harbiy amaliyotlarini muvofiqlashtiruvchi AQSh qurolli kuchlari markaziy qo‘mondonligi (Centcom) ma’lumotiga ko‘ra, AQSh va Britaniya Yamanda Eron bilan aloqador bo‘lgan husiychilarning pozitsiyalari bo‘ylab yangi zarbalar yo‘lladi.
Bunga javoban husiychilar Isroil tomonga dron va raketalar uchirgan, ularning aksari to‘xtatib qolingan.
Mahalliy vaqt bilan soat 19:20 da amerikalik va britaniyalik harbiylar Yamanda husiychilarning oltita raketa uchirish qurilmasiga zarba bergan, bu qurilmalar Qizil dengizdagi kemalar qanotli raketalar uchirishga tayyor turgandi.
Zarbalar Yamandagi 13 ta turli joydagi jami 36 ta nishon bo‘ylab berilgan.
AQSh Markaziy qo‘mondonligi e’lon qilgan bayonotda qayd etilishicha, raketalar AQSh harbiy-dengiz kuchlarining mintaqadagi kemalari hamda savdo kemalariga to‘g‘ridan to‘g‘ri xavf tug‘dirgan.
Centcom bayonotida ta’kidlanishicha, shanba kungi qo‘shma bayonot AQSh va Buyuk Britaniya hukumatlari ko‘rsatmasi bilan Avstraliya, Bahrayn, Kanada, Daniya, Niderlandiya va Yangi Zelandiya ko‘magida boshlangan.
«Bu yuqori aniqlikdagi zarbalar husiychilar jahon savdosi va oddiy dengizchilar hayotiga tahdid solish uchun qo‘llanadigan imkoniyatlarni yo‘q qilish va zaiflashtirishga qaratilgan bo‘lib, husiychilarning qator xavfli harakatlariga javob hisoblanadi», — deyilgan bayonotda.
AQSh va Buyuk Britaniya husiychilarning obektlari bo‘ylab zarbalarni o‘tgan oyda boshlagan, bunga husiychilarning Qizil dengizdagi kemalariga davomli hujumlari sabab bo‘lgandi.
Shundan buyon AQSh muntazam ravishda zarba yo‘llab keladi. Payshanba kuni AQSh kuchlari husiychilarning Adan bo‘g‘ozidagi dronini, shuningdek pilotsiz kater va kemalarga qarshi ikkita ballistik raketalarini yo‘q qilgan.
Tramp jim
Baydenning bo‘lajak prezidentlik saylovlaridagi ehtimoliy raqibi Donald Tramp hamon AQSh zarbalari borasida sukut saqlamoqda. U ijtimoiy tarmoqlarda Respublika partiyasi ichidagi so‘nggi raqibi Nikki Heyliga hujum qilishda davom etmoqda.
Politico nashri ta’riflaganidek, «Tramp, aftidan, Baydenga qaraganda qat’iyroqligi haqidagi iddaolari va shunchaki regiondan ketish bo‘yicha pozitsiyasi orasida ikkilanib qolmoqda».
Respublikachilar Baydenni asosan AQShning javob choralari kechikayotgani uchun, shuningdek Vashington o‘z rejalari haqida Eronni oldindan boxabar qilib qo‘yayotgani tufayli tanqid qilmoqda.
