“Olmaliq tikuvchilik fabrikasi” deb nomlangan mazkur korxonaning ochilish tadbirida Olmaliq kon-metallurgiya kombinati rahbariyati, Namangan viloyati, Pop tumani hokimligi mas’ullari, nuroniylar va jamoatchilik vakillari ishtirok etishdi.
Tadbirda so‘z olgan, Olmaliq kon-metallurgiya kombinati boshqaruvi raisi, senator Abdulla Xursanov yurtimizda xotin-qizlarning jamiyatda o‘z o‘rniga ega bo‘lishi uchun zarur ijtimoiy va iqtisodiy shart-sharoitlarni yaratish bo‘yicha amalga oshirilayotgan ishlarga hamohang tarzda Olmaliq kon-metallurgiya kombinati ham doimiy ravishda salmoqli hissa qo‘shib kelayotganini ta’kidladi. Va foydalanishga topshirilayotgan tikuvchilik fabrikasi chodaklik xotin-qizlar uchun xalqaro bayramga munosib sovg‘a bo‘lishini bildirdi.
Shuningdek tadbirda so‘z olgan Pop tumani hokimi A’zamjon Sultonov, Chodak kon boshqarmasi mehnat faxriylari, fabrika yosh xodimlari prezidentimiz tomonidan olib borilayotgan islohotlarga munosib hissa qo‘shayotgan OKMK rahbariyatiga o‘z minnatdorchiligini bildirishdi.
Ramziy lenta qirqilib, fabrika rasman o‘z faoliyatini boshladi.
Kombinat homiyligida «OKMK Chodak Tekstil» MChJ bilan hamkorlikda ishga tushirilgan tikuvchilik fabrikasiga Yaponiya va Xitoy davlatlarining zamonaviy ilg‘or tikuvchilik dastgohlari keltirilgan.
E’tiborlisi, ushbu korxonada endilikda 520 nafar xotin-qizlar ish bilan ta’minlandi.
Fabrika asosan erkaklar va ayollar jinsi shimlari kabi mahsulotlarni ishlab chiqaradi. Korxonaning ishlab chiqarish yillik quvvati 520 ming dona mahsulot bo‘lib, mahsulotlarning 50 foizi eksportga yo‘naltiriladi. Yana bir muhim jihat korxona mahsulotlariga hozirning o‘zida salkam 1 yilga yetadigan buyurtmalar kelib tushgan.
Tadbirda 8 mart - Xalqaro xotin-qizlar kuni munosabati bilan bir guruh fabrika ayollari esdalik sovg‘alari bilan rag‘batlantirildi.
