Rossiyaga dronlarning yopirilma hujumi: to‘qqiz region zarba ostida qoldi

Oryolda esa dron neft bazaga kelib urilgan. Orlov oblasti gubernatori Andrey Klichkov ham uni «yonilg‘i-energetika kompleksi obekti» deb atagan va u qaysi kompaniyaga tegishli ekaniga oydinlik kiritmagan. Bu yerda neft saqlash omborining rezervuari yonib ketgan, olov 100 kvadrat metr maydonni qamrab olgan, uni o‘chirish uchun o‘nlab o‘t o‘chiruvchilar va o‘t o‘chirish poyezdi jalb etilgan.

Soat 10 dan keyin Klichkov telegramda «dronlarning tungi hujumi oqibatlari» bartaraf etilgani, shahardagi «tutun tarqashi» hech qanday xavf tug‘dirmasligi va bu «o‘t o‘chiruvchilar faoliyati oqibati» ekanini bildirdi.

Oryol shahri meri Yuriy Paraxin rasmiylar yonilg‘i obekti atrofida joylashgan ikkita ko‘p qavatli uydan 17 kishi evakuatsiya qilinganini ma’lum qilgan.

Moskva meri Sergey Sobyanin 12 martga o‘tar kechasi Moskvaga uchib kelayotgan dron urib tushirilgani haqida xabar bergan. «Bugun havo hujumidan mudofaa kuchlari Ramensk shahar okrugida Moskva yo‘nalishidagi dronni urib tushirdi. Dastlabki ma’lumotlarga ko‘ra, parchalar tushgan joyda vayrongarchiliklar va jabrlanganlar qayd etilmagan», — deya yozgan Sobyanin.

Ramenskiy okrugi Moskvadan janubi-sharqda joylashgan.

Moskvaga oxirgi bor dronlar hujumi qariyb ikki oy muqaddam — 17 yanvar kuni kuzatilgandi.

Oldingi hujumlar

Joriy yilda Rossiyaning yonilg‘i-energetika obektlariga hujumlar soni oshdi. Dronlar Leningrad oblasti va Peterburgdagi yoqilg‘i terminallariga, shuningdek  «Rosnefti»ning Tuapsedagi zavodiga va boshqa muhim infratuzilma obektlariga qadar yetib kelgan.

24 fevralga o‘tar kechasi amalga oshirilgan havo hujumidan so‘ng Rossiyadagi eng yirik po‘lat zavodi — Novolipetsk metallurgiya kombinatida yong‘in chiqqan.

O‘tgan haftada, 7 mart kuni, mahalliy rasmiylar «noma’lum uchuvchisiz uchar apparat kelib urilishi» oqibatida «Severstal»ga tegishli bo‘lgan Cherepovetskiy metallurgiya kombinatida «cho‘yan eritish pechida texnologik hodisa» ro‘y berganini ma’lum qilishdi. Bu Rossiyadagi ikkinchi eng yirik po‘lat zavodi hisoblanadi.

Bir kun oldin esa Kursk oblastida Mixaylovskiy kon-boyitish kombinati (Rossiyadagi ikkinchi eng yirik shunday korxona) dronlar hujumiga uchragani, buning oqibatida yonilg‘i saqlanayotgan rezervuarlar yonib ketgani xabar qilingandi. Ukrain manbalari o‘z manbasiga tayanib, Mixaylovskiy kombinatiga hujum Ukraina mudofaa vazirligi Bosh razvedka boshqarmasi o‘tkazgan amaliyot bo‘lganini yozishdi.

Hozirda Ukraina tomoni Rossiyaning to‘qqiz hududi bo‘ylab dronlarning yopirilma hujumi yuzasidan izoh bermayapti. Rossiya ham har kuni Ukraina bo‘ylab o‘nlab dronlar orqali hujumlar uyushtirib keladi.

Chegaradagi vaziyat

Avvalroq dronlarning tungi hujumi va aholi yashash manzillari o‘qqa tutilgani to‘g‘risida xabar bergan Belgorod oblasti gubernatori Vyacheslav Gladkov kun o‘rtalarida Belgorodda Rosgvardiya xodimlari yana bir dronni o‘qotar quroldan urib tushirganini ma’lum qildi va bu orqali shahar hududida ko‘cha janglari ketayotgani haqida tarqalgan xabarlarni rad etdi.

Bu vaqtda Kursk oblasti gubernatori Roman Starovoyt Ukraina qurolli kuchlari Tetkino posyolkasini o‘qqa tutayotgani haqida xabar berdi. Avvalroq rossiyalik harbiy blogerlar Ukraina hududidan kirib kelgan diversantlar Kursk (Tetkino hududida) va Belgorod oblastida chegarani kesib o‘tganini xabar qilgandi.

Starovoytning so‘zlariga ko‘ra, «diversiya-razvedka guruhlari yorib kirishga urinmoqda, o‘qotar qurollar janggi bo‘lib o‘tmoqda, ammo hech qanday yorib o‘tish yo‘q».

Keyinroq FXX ushbu ikki region hududida davlat chegaralarini buzib o‘tish maqsadidagi bir necha urinishlar kuzatilganini ma’lum qildi. Rossiya maxsus xizmatlari dushman tuzilmalari katta yo‘qotishlarga uchraganini bildirgan.

RF mudofaa vazirligi esa o‘z press-relizida tungi soat uchlar atrofida chegarani kesib o‘tishga birinchi urinish kuzatilgani, ertalabki soat sakkizdan keyin esa Tetkino hududida chegarani buzib o‘tishga uringan yana to‘rt guruh hujumi qaytarilgani haqida ma’lum qildi.

Ukraina hukumati bu bayonotlarga munosabat bildirmagan. Ukraina mudofaa vazirligi bosh razvedka boshqarmasi esa Rossiya hududiga hujum qilgan guruhlar Rossiya fuqarolaridan tarkib topganini eslatib o‘tgan.