G‘azodagi vaziyat
G‘azoda Isroil agressiyasi qurbonlari soni 32 ming 975 kishiga yetgan. Bu haqda G‘azo sog‘liqni saqlash vazirligi ma’lumot bergan. Urushning 179-kuniga kelib, yaralanganlar soni 75 ming 577 nafarga yetgan
So‘nggi sutka ichida isroillik harbiylar 5 ta ommaviy qirg‘inni amalga oshirgan. Natijada 59 kishi qurbon bo‘lgan, 83 kishi yaralangan.
2023 yilning 7 oktyabridan buyon Falastinda qurbon bo‘lgan jurnalistlar soni 140 nafarga yetgan.
BMT bolalar fondi — UNICEFʼning bosh direktori o‘rinbosari Ted Chaybanga ko‘ra, G‘azodagi bolalarning teng yarmi oziq-ovqat yetishmovchiligiga duchor bo‘lgan. O‘nlab bolalar ochlikdan vafot etgan.
Isroil parlamentiga hujum
HAMAS tomonidan asirga olinganlarning oilalari Isroil parlamenti — Knessetning moliyaviy komissiyasi majlisiga bostirib kirishdi va G‘azoda o‘t ochishni to‘xtatishni talab qilishdi.
So‘nggi vaqtlarda Netanyahu ma’muriyatiga qarshi namoyishlar tobora faollashmoqda. 7 oktyabrdan so‘ng shanba kunlari muntazam o‘tkaziladigan namoyishlar ancha tinchib qolgan edi. Biroq 30 mart, shanba kuni hukumatga qarshi eng yirik norozilik namoyishi bo‘lib o‘tdi. So‘nggi namoyish politsiya bilan to‘qnashuvlarga aylanib ketdi va o‘nlab namoyishchilar hibsga olindi.
O‘shandan buyon namoyishlar uzilmasdan davom etmoqda. Namoyishchilar G‘arbiy Quddusdagi parlament binosi oldiga shiorlar va mash’alalar ushlagancha yig‘ilishgan va ular yangi saylovlar o‘tkazishni talab qilib, Netanyahuni garovdagilarni ozod qilish bo‘yicha kelishuvlarga monelik qilishda ayblagan.
Eronning Isroilga hujumi?
Isroil tomonidan Suriya poytaxti Damashqdagi Eron konsulligi yo‘q qilinishi va unda Eron islom inqilobi muhofizlari korpusining bir nechta oliy martabali a’zolari halok bo‘lganiga javoban Eron keyingi 48 soat ichida Isroilga hujum qilishi mumkinligi xabar qilinmoqda. Bu haqda AQSh Bosh razvedka boshqarmasi go‘yoki Isroilni ogohlantirgan, deb xabar bermoqda Eronga yaqin medialar.
Eron Livan, Iroq yoki Yamandagi proksi guruhlar orqali emas, o‘z hududidan uchirilgan pilotsiz parvoz qurilmalari galasi va qanotli raketalar bilan Isroil hududidagi strategik obektlarga kombinatsion zarba berishni mo‘ljallamoqda, deb xabar bergan Isroilning 12-telekanali.
