Sobiq «O‘zstandart» agentligining yangi rahbarining uch nafar yangi o‘rinbosari ish boshladi.
Vazirlar Mahkamasining tegishli karori bilan Texnik jihatdan tartibga solish agentligi («O‘zstandart») direktoriga uch nafar o‘rinbosar tayinlandi. Bu haqda bosh vazir matbuot kotibi xabar bermoqda.
Xususan, Abdurauf Abduqayumov O‘zbekiston texnik jihatdan tartibga solish agentligi direktorining birinchi o‘rinbosari sifatida ish boshlagan.
U 1979 yilda Toshkent shahrida tug‘ilgan. 2002 yilda Toshkent davlat texnika universitetini (magistr) tamomlagan. Muqaddam mazkur agentlikda boshqarma boshlig‘i sifatida ishlagan, oxirgi vaqtlarda agentlik direktoriga o‘rinbosar edi.
Odiljon Tohirov O‘zbekiston texnik jihatdan tartibga solish agentligi direktorining o‘rinbosari, Azamat Abdurahmonov O‘zbekiston texnik jihatdan tartibga solish agentligining Texnik jihatdan tartibga solish sohasida nazorat inspeksiyasi boshlig‘i etib tayinlandi.
Odiljon Tohirov muqaddam agentlikda Muvofiqlikni baholash va sifat tizimlarini joriy etish boshqarmasi boshlig‘i bo‘lgan.
Azamat Abdurahmonov bungacha Energetika vazirligi Elektr energiyasi, neft mahsulotlari va gazdan foydalanishni nazorat qilish inspeksiyasi («O‘zenergoinspksiya») Toshkent shahri boshqarmasi boshlig‘i lavozimida ishlagan.
Texnik tartibga solish agentligi 2021 yilda prezident farmoniga asosan Standartlashtirish, metrologiya va sertifikatlashtirish agentligi negizida tashkil etilgan. Agentlik texnik jihatdan tartibga solish va metrologiya sohalarida davlat siyosatini amalga oshiruvchi respublika davlat boshqaruvi organi hisoblanadi.
O‘zbekiston texnik jihatdan tartibga solish agentligi «O‘zstandart» agentligining huquqlari, majburiyatlari va shartnomalari, shu jumladan xalqaro shartnomalari bo‘yicha huquqiy vorisi hisoblanadi.
Agentlikka 2018 yildan buyon rahbarlik qilib kelgan Dilshod Sattarov 2024 yil yanvarida «o‘z tizimidagi kamchiliklar va sustkashlik» uchun lavozimidan ozod etilgandi. Fevral oyida esa energetika vaziri o‘rinbosari Akmal Jumanazarov uning o‘rniga agentlikning yangi direktori sifatida ish boshlagandi.
