Ekvador hukumati uyushgan jinoyatchilikka qarshi kurash choralarini kuchaytiradi

Ekvador prezidenti Daniel Noboa ovozlarning 13 foizi hisoblab chiqilgach, uyushgan jinoyatchilikka qarshi choralarni kuchaytirish bo‘yicha o‘tkazilgan referendumda g‘alaba qozonganini e’lon qildi. «Biz mamlakatni himoya qildik, endi jinoyatchilikka qarshi kurashish va Ekvador oilalariga tinchlik o‘rnatish uchun ko‘proq resurslarimiz bor», — deb yozdi Noboa 21 aprel, yakshanba kuni Instagram sahifasida.

Referendum ishtirokchilaridan hukumatning armiya va politsiya vakolatlarini kengaytirish, o‘qotar qurollar ustidan nazoratni kuchaytirish va jinoyat sodir etgan uyushgan guruhlar a’zolariga nisbatan jazoni qat’iylashtirish tashabbusiga o‘z munosabatini bildirish so‘ralgan. Hukumat tomonidan taklif etilayotgan chora-tadbirlar qatoriga harbiy-politsiya qo‘shma patrul xizmatini joriy etish, qidiruvda bo‘lgan jinoyatchilarni ekstraditsiya qilish, terrorizm, qotillik va boshqa jinoyatlar uchun qamoq jazosini uzaytirish kiradi. 

Ekvadorda jinoiy zo‘ravonlik 

Ovoz berish vaqtida rasmiylar Ekvador g‘arbidagi Manabi provinsiyasida qamoqxonalardan birining direktori halok bo‘lganini va Los-Rios provinsiyasidagi qamoqxonalardan birida tartibsizlik uyushtirishga urinish bo‘lganini tasdiqladi. 18 million aholisi bo‘lgan Lotin Amerikasi davlati jinoiy zo‘ravonlik va narkotik kartellarining ta’siridan aziyat chekmoqda. Birgina mamlakat qamoqxonalarida ichki nizolar oqibatida yuzlab mahbuslar halok bo‘lgan. 

Yanvar oyida kuchli «Los Choneros» to‘dasi rahbari, narkobaron Adolfo Macias qamoqdan qochib ketganidan so‘ng, Noboa «ichki qurolli mojaro» tufayli favqulodda holat va komendantlik soati e’lon qildi. O‘sha oyda yuziga niqob taqib olgan shaxslar jonli efirda TC Televisión davlat televideniyesiga bostirib kirib, bir necha jurnalist va xodimlarni garovga oldi.